Google компанияси Google Photos иловаси учун “Сўров асосида таҳрирлаш” номли инновацион функцияни тақдим этди. TechCrunch хабар беришича, бу янги имконият фойдаланувчиларга овозли буйруқлар ёки матнли тавсифлар ёрдамида тасвирларга ўзгартиришлар киритиш имконини беради. Бу эса таҳрирлаш жараёнини анча осонлаштиради.
“Сўров асосида таҳрирлаш” функцияси Gemini сунъий интеллект тизимига асосланган бўлиб, табиий тилдаги сўровларни қайта ишлаш имконини беради. Фойдаланувчилар “Орқа пландаги машиналарни олиб ташланг” каби аниқ кўрсатмаларни ёки “Бу эски суратни тикланг” каби умумийроқ буйруқларни беришлари мумкин.
Ушбу восита анъанавий фотомуҳаррирлар бўйича чуқур билимга эга бўлмаган кишиларга ёрдам бериш учун мўлжалланган. У ёруғликни созлаш ёки чалғитувчи элементларни олиб ташлаш каби оддий амалларни ҳам, фон ўзгартириш ёки расмга объектлар қўшиш каби ижодий вазифаларни ҳам бажаришга қодир. Мисол учун, фотосуратдаги кишига кўзойнак ёки байрам қалпоғини осонгина қўшиш мумкин.
Аниқ сўров шакллантиришга қийналганлар учун “Яхшиланг” буйруғи мавжуд бўлиб, ундан сўнг Google Photos автоматик равишда оптимал тузатишларни киритади. Илова, шунингдек, такомиллаштириш бўйича тавсиялар бериши ва тузатишларни нозик қайта ишлаш учун кетма-кет сўровларни қўллаб-қувватлаши мумкин.
“Сўров асосида таҳрирлаш” функцияси аллақачон ишга туширилган, бироқ у Android ва iOS қурилмаларида аста-секин жорий этилади.
Бундан аввал Google Docs матнли ҳужжатларни сунъий интеллект подкастларига айлантиришни ўзлаштиргани хабар қилинганди.
Изоҳ (0)