Қирғизистон президенти Садир Жапаров Буюк Британия ва АҚШ ҳукуматлари томонидан Қирғизистоннинг бир қатор банкларига нисбатан киритилган санкцияларга изоҳ берар экан, Қирғизистон молия муассасаларининг Ғарбнинг Россияга қарши санкцияларини четлаб ўтишда иштироки ҳақида бирорта ҳам далил йўқлигини таъкидлади. Бу ҳақда у Kabar миллий ахборот агентлигига берган интервьюсида билдирган.
“Буюк Британия ҳукумати ъМарказий Осиё капитал банкиъга нисбатан санкциялар киритилгани ҳақида хабар берди. Бунга сабаб сифатида ушбу молия муассасаси гўёки Ғарб давлатларининг Россияга қарши киритган санкцияларини четлаб ўтишга кўмаклашиши мумкинлиги кўрсатилган. Январь ойида АҚШ ъКеремет Банкъни санкцияларни четлаб ўтишда иштирок этиши мумкинлигини айтиб, унга қарши чекловлар жорий этган эди. Бироқ улар бирор-бир қоидабузарлик фактини кўрсата олмади. Кўрсата олмайди ҳам, чунки бундай фактлар йўқ ва бўлмаган”, деди Жапаров.
Унинг сўзларига кўра, бугунги кунда Қирғизистонда 21 та банк фаолият юритмоқда. Хатарларни камайтириш учун фақат давлат “Керемет Банки” Россия рубли билан ишлашига қарор қилинган. Барча операциялар давлат назорати остида бўлиб, фойда давлат бюджетига тушади.
“Энди АҚШ ъКеремет Банкъка қарши санкциялар қўллаганидек, Англия ҳам ъКапитал Банкъка қарши чекловлар киритмоқда. Ва яна ҳеч қандай фактлар йўқ, фақат шубҳалар”, деди президент.
“Мен ушбу мамлакатларнинг олий раҳбариятига, Дональд Трамп ва Кир Стармерга мурожаат қилмоқчи эдим. Балки уларга маълумот етиб бормаётгандир. Иқтисодиётни сиёсийлаштириш тўғри эмас”, деди у.
Жапаров Қирғизистон кўп йўналишли сиёсат юритаётгани ва Ғарб давлатлари билан иқтисодий соҳада ҳамкорлик қилаётганини эслатган. Хусусан, Буюк Британияга олтин экспортининг йиллик ҳажми қарийб бир миллиард долларни ташкил этади. Унинг фикрича, бу ҳолатда Қирғизистонга нисбатан бундай муносабатни адолатли деб бўлмайди.
Президентнинг таъкидлашича, агар шубҳа туғилса, хорижий ҳамкорлар маълумотларни тўғридан тўғри сўраши мумкин, чунки банк барча маълумотларни очиқ тақдим этишга тайёр.
Унинг айтишича, Қирғизистон банклари асосан Россияда ишлаётган ватандошларнинг пул ўтказмаларига хизмат кўрсатади.
“Мен ҳар доим айтганман ва яна бир бор такрорлайман: биз халқаро мажбуриятларга риоя қилишга тайёрмиз. Биз уларга амал қилдик, амал қилмоқдамиз ва бундан кейин ҳам амал қиламиз. Аммо мен фуқароларимиз манфаатлари ва мамлакатнинг савдо-иқтисодий ривожланишини йўққа чиқаришга йўл қўймайман”, дейди Жапаров.
Изоҳ (0)