Ўзбекистонда суд соҳаси рақамлаштирилади

Мамлакатда одил судлов соҳасини рақамлаштириш мақсадида ривожланган давлатларнинг тажрибаси асосида “Рақамли суд” концепцияси ишлаб чиқилди. Бу ҳақда 21 август куни президент Шавкат Мирзиёевга қилинган тақдимотда муҳокама этилди.

Президент матбуот хизмати тақдимотда очиқ судлов ва тизимни рақамлаштириш масаласи муҳокама қилинганини билдирди. Ўз навбатида малакали кадрлар тайёрлаш муаммосига ҳам ечимлар таклиф этилган.

“Одил судлов соҳасини рақамлаштириш мақсадида ривожланган давлатларнинг тажрибаси асосида ‘Рақамли суд’ концепцияси ишлаб чиқилди ва уни изчил амалга ошириш бўйича чора-тадбирлар белгиланди. Бу коррупциянинг олдини олиш, фуқаролар ва тадбиркорларга оворагарчиликсиз одил судловга эришиш имкониятларини кенгайтиришга хизмат қилади”, дейилади манбада.

Таҳлилларга кўра, фуқаролик ва иқтисодий судларда кўриладиган даъволарнинг катта қисми низосиз ишларга тўғри келмоқда. Шу сабаб бундай масалаларни маъмурий органлар ваколатига ўтказиш таклиф этиляпти. Натижада фуқаролар ва тадбиркорлик субъектлари муаммолари қисқа муддатда ҳал этилиши таъминланади.

Тақдимотда маъмурий ва иқтисодий суд ишларини экстерриториал тарзда кўриш тартибини жорий этиш масаласи кўрилган. Судьяликка тайинлаш муддатларини қайта кўриб чиқилиши айтилган.

“Барча йўналишдаги судлар бўйича минтақавий тафтиш судларини ташкил этиш, вилоят ва унга тенглаштирилган судлардаги тафтиш инстанцияларини тугатиш таклифи билдирилди. Бунда вилоят ва унга тенглаштирилган судларда фақатгина апелляция ва кассация инстанцияси бўлиши, тафтиш инстанцияси эса 5 та минтақавий судда ташкил этилиши режалаштирилмоқда”, дея қайд этилган хабарда.

Мулоқотда Судьялар олий мактаби негизида Одил судлов академиясини ташкил этиш концепцияси тақдим қилинган. Давлат раҳбари билдирилган таклифларни маъқуллаб, тегишли фармонларни имзолаган.

Аввалроқ собиқ ташқи ишлар вазири, айни пайтда Марказий Осиё сунъий идрок ассоциацияси раиси Владимир Норов “Дарё” мухбирига берган интервьюсида Ўзбекистон суд тизимида сунъий интеллектдан фойдаланиш тезроқ йўлга қўйилиши кераклигини айтганди.