Сурхондарё вилояти Ангор туманида жойлашган боғчалардан бирининг ҳудудидаги дарахтлар ноқонуний кесилгани аниқланди, деб хабар беради Экология ва атроф-муҳитни муҳофаза қилиш давлат қўмитаси.
Маълум қилинишича, Сурхондарё вилояти Экология ва атроф-муҳитни муҳофаза қилиш бошқармасига Ангор тумани «Гулзор» маҳалласи ҳудудида жойлашган боғчадаги дарахтлар кесиб ташлангани ҳақида хабар келиб тушган. Мурожаатга асосан Давлат экологик назорат инспекторлари томонидан маҳалла ҳудудида жойлашган 6-сонли Мактабгача таълим муассасаси биноси ҳудудида 1 туп арча, 1 туп рус дарахти ва 41 туп туя дарахтлари таг қисмидан ноқонуний кесилгани аниқланган.
Ҳозирда ушбу ҳолат юзасидан Давлат экологик назорат инспекторлари томонидан ўрганиш ишлари олиб борилмоқда.
Аввалроқ Тошкентнинг «Туркистон» саройи олдидаги чинор ва тераклар кесиб ташлангани, Андижонда 25 йиллик дарахтлар ўрнида ихтисослаштирилган мактаб қурилиши, Сирдарёда 170 туп тол дарахти кесиб ташлангани тўғрисида хабар берилганди.
Изоҳ (0)