Ўзбекистон Профессионал футбол лигасининг янги сайланган Ижроия қўмитаси йиғилишида сўнгги бор 2019 йилги мавсумда ўтказилган Лига Кубоги мусобақасини 2022 йилги мавсумдан бошлаб давом эттириш масаласи кўриб чиқилди. Бу ҳақида ПФЛ матбуот хизмати маълум қилди.
2022 йилги мавсум учун Осиё Футбол Конфедерацияси томонидан мураккаб тақвим тузиб чиқилди. Аввалги йиллардаги пандемия сабаб қатор мусобақаларни кечиктиришга мажбур бўлган Конфедерация, эндиликда максимал даражада уларни ўтказишга ҳаракат қиляпти.Маълумот учун, Ўзбекистон Лига Кубоги 2019 йилда ташкил этилган. Дастлабки мусобақада Ўзбекистон Суперлигасининг 14 жамоаси ва Про Лиганинг иккита клуби иштирок этган. Мусобақанинг илк ва амалдаги чемпиони «Пахтакор» клуби ҳисобланади.Шунингдек, Ўзбекистон футбол ассоациацияси U-23 Осиё чемпионатини қабул қилишга қарор қилган. Қўшимчасига, Осиё кубогининг саралаш учрашувлари ҳам Ўзбекистонда бўлиб ўтади. Суперлига иштирокчиси бўлган «Олимпик» футбол клубининг қатор футболчилари қитъа чемпионатига жалб этилади.
Бунинг оқибатида Суперлига ҳамда Про Лига клубларида айни футбол ўйнайдиган ойларда катта танаффуслар юзага келади. Июнь ойининг дастлабки 15 кунлигида ички мусобақаларни ташкил этиш имконияти мавжуд эмас. Июль ойидаги иссиқ об-ҳаво ҳам яна бир муаммони вужудга келтиради.
Қўшимчасига, «Олимпик» футболчилари асосини ташкил этувчи Ўзбекистон термаси сентябр ойида Хитойда бўлиб ўтадиган Осиё ўйинларида қатнашиши режалаштирилган. Бунга ФИФА кунлари ҳам уланиб кетади.
Юқоридагилардан келиб чиқиб, Ўзбекистон ПФЛ Ижроия қўмитаси Лига Кубоги мусобақасини тиклаш зарурати мавжуд деган қарорга келди. Мазкур мусобақага қўшни республикалар жамоаларини жалб этиш ҳам режага киритилган. Якунда иштирокчиларнинг аниқ сонидан келиб чиқиб, мусобақа форматини шакллантирилади.
ПФЛ матуот хизмати
Эслатиб ўтамиз, 2020 йил ушбу мусобақага Тожикистон ва Қирғизистон клублари ҳам таклиф этилган, аммо пандемия сабаб турнир ўтказилмай қолганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)