PFL Liga Kubogi musobaqasini qayta tikladi. Unga qo‘shni mamlakatlar klublari ham jalb qilinadi

O‘zbekiston Professional futbol ligasining yangi saylangan Ijroiya qo‘mitasi yig‘ilishida so‘nggi bor 2019-yilgi mavsumda o‘tkazilgan Liga Kubogi musobaqasini 2022-yilgi mavsumdan boshlab davom ettirish masalasi ko‘rib chiqildi. Bu haqida PFL matbuot xizmati ma’lum qildi.

2022-yilgi mavsum uchun Osiyo Futbol Konfederatsiyasi tomonidan murakkab taqvim tuzib chiqildi. Avvalgi yillardagi pandemiya sabab qator musobaqalarni kechiktirishga majbur bo‘lgan Konfederatsiya, endilikda maksimal darajada ularni o‘tkazishga harakat qilyapti.

Shuningdek, O‘zbekiston futbol assoatsiatsiyasi U-23 Osiyo chempionatini qabul qilishga qaror qilgan. Qo‘shimchasiga, Osiyo kubogining saralash uchrashuvlari ham O‘zbekistonda bo‘lib o‘tadi. Superliga ishtirokchisi bo‘lgan “Olimpik” futbol klubining qator futbolchilari qit’a chempionatiga jalb etiladi.

Buning oqibatida Superliga hamda Pro Liga klublarida ayni futbol o‘ynaydigan oylarda katta tanaffuslar yuzaga keladi. Iyun oyining dastlabki 15 kunligida ichki musobaqalarni tashkil etish imkoniyati mavjud emas. Iyul oyidagi issiq ob-havo ham yana bir muammoni vujudga keltiradi.

Qo‘shimchasiga, “Olimpik” futbolchilari asosini tashkil etuvchi O‘zbekiston termasi sentyabr oyida Xitoyda bo‘lib o‘tadigan Osiyo o‘yinlarida qatnashishi rejalashtirilgan. Bunga FIFA kunlari ham ulanib ketadi.

Yuqoridagilardan kelib chiqib, O‘zbekiston PFL Ijroiya qo‘mitasi Liga Kubogi musobaqasini tiklash zarurati mavjud degan qarorga keldi. Mazkur musobaqaga qo‘shni respublikalar jamoalarini jalb etish ham rejaga kiritilgan. Yakunda ishtirokchilarning aniq sonidan kelib chiqib, musobaqa formatini shakllantiriladi.

PFL matuot xizmati

Eslatib o‘tamiz, 2020-yil ushbu musobaqaga Tojikiston va Qirg‘iziston klublari ham taklif etilgan, ammo pandemiya sabab turnir o‘tkazilmay qolgandi.