Орзусидаги сумкани харид қилган аёллар хурсандчилигининг чегараси бўлмаса керак. Аммо бу ҳаммаси эмас, хариддан завқланишда давом этиш учун сумкалардан қандай фойдаланишни билиш лозим. «Домашний очаг» нашрида тақдим этилган сумкаларга ғамхўрлик қилиш борасида асқатадиган лайфхаклар билан танишинг.
Ҳаммага маълумки, пойабзалнинг умрини узайтириш учун унга ғамхўрлик қилиш муҳим, лекин эътиборга нафақат оёқ кийимлар, балки чарм сумкалар ҳам муҳтож.
Ҳафтада бир марта сумкани совунли сув билан артиб олинг
Бунинг учун суюқ совунни илиқ сув билан аралаштириб, юмшоқ мато билан сумканинг ташқи қисмини ҳосил бўлган эритма билан артиб олиш керак. Шундай қилиб, бутун ҳафта давомида сумкага ўрнашган чанг ва кирни олиб ташлаш мумкин.
Сумкадаги намликни қуритишни унутманг
Шу йўл билан тери юзасини сув таъсирида ёмонлашишига йўл қўймаслик мумкин. Тозалаш учун нам салфеткалар, сирка ёки доғ тозаловчи воситаларидан фойдаланиш тавсия этилмайди. Бу маҳсулотларнинг барчаси рангни бузиши, терини қуритиши ва бошқа кўплаб нохуш муаммоларни келтириб чиқарадиган кимёвий моддаларга бой бўлиши мумкин.
Доғларни тозалаш учун мутахассисларга мурожаат қилинг
Уй шароитида чарм сумкага ғамхўрлик қилиш — агар катта доғлар бўлмаса осон. Аммо совунли сув билан чиқмайдиган доғлар бўлса, сумка учун қила оладиган энг яхши нарса уни кимёвий тозалаш марказларига ёки сотиб олган дўконга олиб боришдир. Агар бунинг иложи бўлмаса, кўрсатмаларни диққат билан ўрганиб чиққандан сўнг тери маҳсулотларидан доғларни олиб ташлаш воситаларини синаб кўриш мумкин.
Эски доғлар — фақат кимёвий тозалаш учун
Агар доғлар янги бўлса, махсус воситалар ёрдамида ундан қутулиш мумкин. Аммо анча аввалги доғларни фақат мутахассис ёрдамида бартараф этиш мумкин.
Сумкадан фойдаланмаганда ҳам шаклини сақлаб қолинг
Буни қилиш жуда осон — шунчаки сумка ичини эски кийимлар билан тўлдириш керак. Аммо газета ва журнал саҳифаларидан фойдаланмаслик лозим, чунки қоғоздаги сиёҳ сумка астарида из қолдириши мумкин.
Ёғли доғларни сув билан ювманг
Уларни сумканинг тери юзасидан юмшоқ, қуруқ мато билан артиб олиш тавсия этилади.
Махсус парваришлаш воситаларидан фойдаланинг
Шуни унутмаслик керакки, бу каби воситаларни қўллашдан кейин уларни дарҳол ювиб ташламаслик керак. Юқори сифатли махсус воситалар, албатта, арзон бўлмайди, аммо бу сумкалар умрини узайтиришда сезиларли даражада ёрдам беради.
Муайян тери турига мўлжалланган маҳсулотлардан фойдаланинг
Замш ва тери учун мўлжалланган маҳсулотларнинг таркиби бир хил эмас. Кўз креми у ёқда турсин, тана кремини юз креми сифатида ишлатиб бўлмайди, шундай эмасми? Сумка таркибидан келиб чиқиб, тўғри парвариш қилиш маҳсулотларини танлаш жуда ҳам муҳим.
Қўллашдан олдин ҳар доим маҳсулотни синаб кўринг
Буни ҳеч ким кўрмайдиган сумканинг ички қисмида амалга ошириш мумкин.
Қўл кремидан фойдалангандан кейин сумкани ушламанг
Акс ҳолда, ёғли доғлар ва улар билан бирга кимёвий тозалаш учун кейинги харажатлар сизни кутиб туриши шубҳасиз.
Сумкани қуёш нури остида қолдирманг
Қуёш рангнинг ўзгаришига ва ҳатто сумканинг тери юзасига зарар етказиши мумкин.
Тўқ рангли кийимлар билан очиқ рангли сумкалар киймасликка ҳаракат қилинг
Кийим ишлаб чиқаришда ишлатилган бўёқ сумкада из қолдириши мумкин. Уларни олиб ташлаш ҳатто мутахассислар учун ҳам осон бўлмайди.
Пойабзал бўёғи тозалаб бўлмайдиган доғлар учун
Агар кимёвий тозалаш ҳам доғларни тозалай олмаса, пойабзал учун махсус бўёқдан фойдаланиш мумкин. Фақат бўёқ сумка рангига мос бўлиши керак.
Ёмон ҳидларга қарши атир ва аэрозоллардан фойдаланманг
Агар сумкадан ёмон ҳид чиқса, унинг сабабини аниқлашга ҳаракат қилиш керак. Аммо сумкага атир ва аэрозолларни сепиш мумкин эмас.
Ҳиддан қутулиш учун қабартмадан фойдаланинг
Нохуш ҳидларга қарши курашда қандолатчиликда фойдаланиладиган қабартма ёрдам бера олади. Очилган пакетни сумка ичига солиб, 24 соатга қолдирилади. Бу вақт қабартама учун ҳидларни ўзлаштиришга етарли.
Изоҳ (0)