Албатта, кўпчиликнинг гардеробида ажойиб свитер ёки қулай джинси шимлар каби қадрдон бўлиб улгурган кийимлар бор, кейинчалик уларнинг ўрнини босувчиларини топиш эса муаммо бўлиши мумкин. «Lady.mail.ru» нашри уларнинг умрини узайтиришга оид бир қанча тавсияларни бериб ўтди.
Доғларни ювишни кечиктирманг
Ҳатто энг эҳтиёткор одамлар ҳам қора ёки оқ кўйлак ҳамда джинси шимлардаги қаҳва доғларидан ҳимоялана олмайди. Агар тасодифан бу каби муаммога дуч келсангиз, тозалаш жараёнини дарҳол бошлаш керак. Доғни кетказиш қанчалик ортга сурилса, уни тозалаш ҳам шунчалик қийин бўлади. Имкон қадар доғли кийимни махсус гелга ботириш ёки оддий сув билан бўлса ҳам, ювиб юбориш лозим.
Кийимларга атир сепмасликка ҳаракат қилинг
Бу тавсия атирини кийимларга ҳам сепадиган одамлар учун аталган. Биринчидан, атирни терига сепиш керак — шундагина у яхши ифор таратади. Иккинчидан, парфюмерия таркибида спирт ва кимёвий фиксаторлар мавжуд, шунинг учун улар матога зарар етказиши мумкин.
Ёрлиқ кўрсатмаларига риоя қилинг
Ушбу лайфхак кўпчиликка янгилик эмас. Лекин шунда ҳам эътиборли бўлиш лозим. Агар ёрлиқдаги маълумотлар билан танишиб чиқилмаган бўлса, уни кир ювиш машинасига солмаслик керак. Чунки кўрсатмалар муҳим: масалан, нафис либосларни совуқ сувда ювиш мумкин, аммо сиқмаслик керак.
Табиий қуритишга устунлик беринг
Албатта, замонавий технологиялар вазифаларни осонлаштиради ва сизнинг севимли гардеробингиз учун хавф туғдирмайди. Агар иложи бўлса, кийимларни табиий равишда қуритишга ҳаракат қилинг. Чунки машина қуритгичи нозик матоларга зарар етказиши мумкин. Шунингдек, свитерларни илгичга осиб қўйиш ўрнига уларни тахлаб қўйиш тавсия этилади. Акс ҳолда улар кейинги мавсумгача чўзилиб, ўз шаклини ўзгартиради.
Нақшли кийимларни бирданига биргаликда ювинг
Ёрқин рангли тўплам кийимлар одатда бир хилда кир бўлмайди. Шунинг учун уларнинг тепа ёки пастки қисми алоҳида ювилади. Лекин бу тўғри эмас. Ҳамиша уларнинг биттасини иккинчисига нисбатан кўп ювиш кейинчалик улар орасидаги фарқни сезиларли даражада кучайтиради.
Чарм кийимларга алоҳида ғамхўрлик қилинг
Чарм — инжиқ материал, шунинг учун сумка, пойабзал ёки этик эгалари, айниқса, эҳтиёт бўлишлари керак. Маҳсулотларни сув ўтказмайдиган воситалар билан сақлаш ҳақида унутманг: чунки намлик туфайли чарм осонгина деформацияланади. Ювиб бўлгандан кейин пойабзални қуруқ юмшоқ мато билан қуритиш тавсия этилади.
Изоҳ (0)