Ўзбекистонда янги таҳрирдаги Йўл ҳаракати қоидалари тасдиқлангани тўғрисида хабар берилганди. Шундан сўнг ижтимоий тармоқда Вазирлар Маҳкамаси янги йўл ҳаракати қоидаларини жамоатчилик муҳокамасисиз тасдиқлагани эътирозларга сабаб бўлди. Йўл ҳаракати хавфсизлиги хизматининг маълум қилишича, ҳужжат лойиҳасида Норматив-ҳуқуқий ҳужжатлар лойиҳалари муҳокамаси порталида 15 кун давомида муҳокама қилинган.
Маълум қилинишича, Ички ишлар вазирлиги томонидан «Йўл ҳаракати қоидаларини тасдиқлаш тўғрисида»ги Вазирлар Маҳкамасининг қарори лойиҳаси ишлаб чиқилиб, кенг жамоатчиликнинг фикр ва мулоҳазаларини ўрганиш мақсадида 2021 йил 30 ноябрь куни ID-53261 рақами билан Норматив-ҳуқуқий ҳужжатлар лойиҳалари муҳокамаси порталига жойлаштирилган. Лойиҳа 15 кун давомида ушбу порталда муҳокама этилиб, 2021 йил 15 декабрь куни муҳокама якунланган.
Мазкур қарорга мувофиқ аҳоли пунктларида транспорт воситаларининг тезлигини 70 километр/соатдан, мактаб ва мактабгача таълим ташкилотлари атрофидаги йўлларда 300 метргача бўлган масофада 30 километр/соатдан, турар жой даҳалари ва ёндош ҳудудларда, уй-жой бинолари орасидаги ер участкасида эса соатига 20 километр оширмасдан ҳаракатланишга рухсат этилади.
Бунда «Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида»ги президент қарорига кўра, йўл ҳаракати хавфсизлиги бўйича Республика комиссияси қарори билан Тошкент, Нукус шаҳарлари ва вилоятлар марказларида юқори ҳаракат интенсивлиги ва одамлар гавжум жойларда максимал тезликни 60 километр/соатгача камайтириш мумкин.
Енгил автомобилларда юк ташишга, уларнинг том қисмига ўрнатилган юкхонадаги юкнинг баландлиги 1 метрдан (махсус мосламалар билан мустаҳкамланган ҳолда велосипедларни ташиш бундан мустасно) ва узунлиги автомобиль габаритидан ярим метрдан ошмаган тақдирда йўл қўйилади. Юк автомобиллар йўл ҳаракати қоидаларида белгиланган айрим истиснолардан ташқари барча ҳолатларда йўлнинг фақат ўнг қатнов қисмидан ҳаракатланиши шарт.
Транспорт воситаларининг қайрилиб олиш жойларида ва унга 30 метр етмасдан ёки ўтиб тўхташ тақиқланади. Сутканинг қоронғи вақтида ва етарлича кўринмайдиган шароитда велосипед йўлкаси бўлмаган ҳолда йўлнинг қатнов қисмида ҳаракатланаётган велосипедчилар нур қайтарувчи камзулда ёки нур қайтарувчи элементлар бўлган устки кийимда бўлиши шартда. Бунда ушбу нур қайтарувчи элементлар бошқа ҳайдовчиларга кўринадиган бўлиши керак.
Бундан ташқари, 2022 йил 1 майдан бошлаб аҳоли ҳамда ҳайдовчилар ўртасида 7 ёшгача бўлган болаларни махсус болалар ўриндиғида, 7 ёшдан 12 ёшгача бўлган болаларни махсус ушлаб турувчи мосламали хавфсизлик камарини таққан ҳолда ташиш, транспорт воситасининг орқа ўриндиғидаги йўловчилар ҳам хавфсизлик камарларини тақиб олишлари, шунингдек, сутканинг қоронғи вақтида ва етарлича кўринмайдиган шароитда йўлни кесиб ўтишда ва йўл ёқаларидан ёки қатнов қисмининг четидан ҳаракатланишда пиёдаларнинг устки кийимида нур қайтарувчи элементлар бўлиши тавсия этилади.
Изоҳ (0)