Футбол бўйича Европа Чемпионлар Лигаси чорак финал жавоб ўйини доирасида «Реал» ва «Челси» 12 апрель, сешанба куни ўзаро баҳс юритди.
«Реал» Мадридда «Челси»ни қабул қилди. Учрашувдан олдин мезбонларнинг имконияти юқори баҳоланганди. Бироқ 15-дақиқада Мэйсон Маунт меҳмонларнинг ҳужумини гол билан якунлаб ҳисобни очди. Жамоалар танаффусга шу ҳисобда йўл олди.
Иккинчи 45 дақиқалик аввалида Антонио Рюдигер бурчакдан оширилган тўпни боши билан дарвозага йўллаб, орадаги фарқни оширди. 62-дақиқага келиб, Маркос Алонсо «Челси»нинг ўйиндаги 3-голига муаллифлик қилганди. Бироқ ушбу вазиятда тўп Алонсонинг қўлига тегди деб баҳоланди ва гол бекор қилинди. 75-дақиқада эса Тимо Вернер ҳимоячиларни кетма-кет доғда қолдириб, ҳисобни барибир 3:0 кўринишига олиб келди. Орадан беш дақиқа ўтиб эса Родриго Лука Модричнинг заргарона узатмасини голга айлантириб, «Реал»ни курашга қайтарди — икки ўйин натижасига кўра умумий ҳисоб: 4:4.
Асосий вақтда ғолиб номи аниқланмагач, жамоалар қўшимча бўлимларга мурожаат қилди. Биринчи экстра-тайм аввалида Карим Бензема боши билан гол уриб, «қироллик клуби»га кейинги босқич эшикларини очди.
Шу тариқа «Реал» драматик руҳда кечган баҳсни ўз фойдасига ҳал қилиб (икки ўйин натижасига кўра 5:4), ЕЧЛ ярим финал босқичига йўл олди. Жамоаларнинг Лондондаги ўйинида 3:1 ҳисобида мадридликлар устун келган.
Европа Чемпионлар Лигаси
1/4 финал, жавоб баҳси
12 апрель, сешанба
«Реал» Испания – «Челси» Англия 2:3
Голлар: 0:1 – 15 Маунт, 0:2 – 51 Рюдигер, 0:3 – 75 Вернер, 1:3 – 80 Родриго, 2:3 – 96 Бензема.«Реал»: Куртуа, Карвахаль, Алаба, Начо (Васкес, 88), Менди (Марсело, 78), Модрич, Кроос (Камавинга, 73), Каземиро (Родриго, 78), Вальверде, Бензема, Винисиус Жуниор (Себальос, 115).
«Челси»: Менди, Тиаго Сильва, Рюдигер, Жеймс, Алонсо, Лофтус-Чик (Сауль, 105), Ковачич (Жоржиньо, 105), Канте (Зиёш, 100), Маунт, Ҳаверц, Вернер (Пулишич, 83).
Огоҳлантиришлар: Жеймс (10), Бензема (37), Вальверде (68), Камавинга (90), Зиёш (102), Ҳаверц (109), Аспиликуэта (113), Карвахаль (118).
Дастлабки ўйин — 3:1.
Изоҳ (0)