Қашқадарё вилоятининг Миришкор тумани ҳокими Шерали Санаев аввалроқ 50 минг доллар пора билан қўлга тушган ўринбосари ҳақида гапириб, ундан бу ишни кутмаганини, сабаби ўринбосари аввал ишончли соҳада ишлаганини айтди. Бу ҳақда «Дарё»га ҳокимнинг матбуот котиби Азизбек Яздурдиев хабар берди.
Азизбек Яздурдиевнинг маълумот беришича, бугун Қарши шаҳридаги Журналистлар уйида Миришкор тумани ҳокими Шерали Санаев иштирокида журналист ва блогерлар учун матбуот анжумани ташкил этилган. Унда сўз олган ОАВ вакиллари Шерали Санаевга юзланиб, 50 минг доллар пора билан қўлга тушган ўринбосари ҳақида сўраган.
«Ҳуқуқ тартибот органлари бу бўйича тергов якунига кўра маълумот беради, албатта. Мени фикримга келсак, ўринбосарим аввалдан ишончли соҳада ишлагани учун унга ишонганмиз, лекин бунақа иш бўлишини ҳечам кутмаганмиз. Шу воқеа юз берганида ҳам бу воқеа ҳақида ўз муносабатимни билдиргандим. Ҳолат тизимимизни назоратга олишимиз кераклигини эслатди», — деган туман ҳокими.
Эслатиб ўтамиз, Шерали Санаевнинг собиқ ўринбосари, ўринбосарликка қадар вилоят ИИБ бошлиғи ўринбосари сифатида ишлаган ва 2021 йилнинг сентябрь ойидан 2022 йилнинг февраль ойига қадар Миришкор тумани Маҳалла ва оилани қўллаб-қувватлаш бўлими бошлиғи лавозимида ишлаган У.Я. фуқарога ер олиб беришни ваъда қилиб, 80 минг доллар сўраган. 2022 йилнинг 5 февраль куни эса сўралган пулнинг 50 минг долларини олаётган пайтида қўлга тушган. Кейинроқ Муборак туман ИИБ бошлиғи Х.Б. ҳам ҳоким ўринбосарига шерикликда гумонланиб, қамоққа олингани хабар берилганди. Ҳоким ўринбосари ва туман ИИБ бошлиғининг хатти-ҳаракати бўйича қўшимча маълумотлар берилмаган.
Изоҳ (0)