Термиздан Санкт-Петербургга мунтазам авиақатновлар тикланади

Термиз шаҳридан Россиянинг Санкт-Петербург шаҳрига авиақатновлар 5 майдан бошлаб тикланмоқда, деб хабар беради Uzbekistan Airways.

Қайд этилишича, 2022 йил 5 майдан бошлаб компания Термиз—Санкт-Петербург—Термиз халқаро йўналишидаги мунтазам авиақатновларни йўлга қўяди. Парвозлар пайшанба кунлари амалга оширилади. Рейслар жадвали қуйидагича:

• Термиздан учиш: 08:55 (Тошкент вақти билан)
• Санкт-Петербургга етиб бориш: 12:20 (Москва вақти билан)
• Санкт-Петербургдан учиш: 13:50 (Москва вақти билан)
• Термизга етиб келиш: 21:00 (Тошкент вақти билан)

«Авиачипталарни авиакомпаниянинг расмий сайтида, Uzbekistan Airways Sales филиалида ёки авиакомпания агентларидан харид қилиш мумкин», — дейилади хабарда.

Эслатиб ўтамиз, Uzbekistan Airways Фарғона водийси шаҳарларидан талаб юқори бўлган йўналишлар бўйича парвозлар амалга ошириш учун «Шарқий хаб» ташкил этиши хабар қилинганди. Унга кўра, 2022 йилнинг 31 январидан бошлаб Uzbekistan Airways Express ҳаво кемаларида Full Economy (тўлиқ иқтисодий синф) тамойили асосида Намангандан Россиянинг 8 та шаҳрига тўғридан-тўғри мунтазам авиақатновларни амалга ошириш бошланади. Талаб ошгани сайин Намангандан йўналиш тармоғини кенгайтириш ҳам кўриб чиқилади. 30 январь куни Наманган халқаро аэропортидан «Шарқий хаб» лойиҳаси доирасидаги илк парвоз амалга оширилган. Шунингдек, Красноярск шаҳрига 29 мартдан бошлаб мунтазам авиақатновлар йўлга қўйилган.