Юрагидаги муаммо сабаб футболдан кетган Серхио Агуэро фаолиятини қайта тикламоқчи
«Барселона»нинг собиқ ҳужумчиси Серхио Агуэро фаолиятини қайта тикламоқчи. Бу ҳақда собиқ футболчининг ўзи маълум қилди.
«ФИФА менга афсона сифатида муносабатда бўлмоқда, лекин кеча яна майдонга чиқиш ҳақида ўйлаб қолдим.
Шифокорлар 5–6 ой футболдан узоқ туришимни айтганди, аммо машғулотларда иштирок этишни ўйлаяпман. Менга ‘Интер Майамиъдан қўнғироқ бўлди, рад жавобини бердим», — дейди Агуэро.
33 ёшли аргентиналик футболчи 2021 йил декабрь ойида юраги билаб боғлиқ муаммо туфайли бутсисини михга илган эди.
Кун Агуэро фаолиятини Аргентинанинг «Индепенденте» жамоасида бошлаган. 2003 йилдан 2006 йилга қадар ушбу жамоада тўп сурган ҳужумчи 56 та ўйинда 23 та гол уришга муваффақ бўлган. Бу эса Европанинг етакчи жамоалари қизиқишига сабабчи бўлганди.
2006 йилда Испаниянинг «Атлетико» жамоаси Агуэрони харид қилади. Кун «матрасчилар» сафида 234 ўйинда 101 та гол урган.
2011 йилда аргентиналик ҳужумчи «Манчестер Сити» сафига бориб қўшилади. Инглиз жамоаси сафида 390 ўйинда 260 та гол уриб, «шаҳарликлар» тарихидаги энг яхши тўпурарга айланди.
«Манчестер Сити» билан шартномаси якунига етган Агуэро 2021 йилда «Барселона»га ўтади. Серхио «кўк-анорранглилар» сафида 3 та ўйинда иштирок этиб, 1 та голни ўз ҳисобига ёздириб қўйди.
Мавзуга доир:
