Рууд ван Нистелрой 2022/23 йилги мавсумдан бошлаб «ПСВ»ни бошқаради.
Ҳозирда «ПСВ-2» бош мураббийи бўлиб турган 45 ёшли мутахассис асосий жамоа билан 2025 йил ёзига қадар мўлжалланган шартнома имзолади.
«Манчестер Юнайтед» ва «Реал» собиқ ҳужумчиси ёзда жамоани тарк этадиган Рогер Шмидтнинг ўрнини эгаллайди.
«Твенте», «Шальке-04», «ПСВ» ва «Фейеноорд»нинг собиқ мураббийи Фред Руттен Нистелройнинг ёрдамчиси бўлади. Шунингдек, 2018—2021 йиллар мобайнида «Эвертон»да ишлаган «ПСВ» собиқ спорт директори Марсель Брандс клубга қайтади.
Рууд ван Нистелрой 1993 йилдан 2012 йилга қадар футболчилик фаолиятини олиб борган. Шу йиллар мобайнида нидерландиялик «Ден Босх», «Ҳеренвен», «ПСВ», «Манчестер Юнайтед», «Реал», «Гамбург» ва «Малага» каби жамоаларда тўп сурган.
«ПСВ» 2021/22 йилги мавсум Нидерландия чемпионатида 27 турдан сўнг 2-поғонадан жой олган. 1-ўриндаги «Аякс»дан 2 очко ортда қолмоқда.
Изоҳ (0)