Буюк Британия бош вазири Борис Жонсон 29 март куни ғарб давлатларининг раҳбарлари билан Украинага кўмак бериш ва ҳар томонлама қўллаб-қувватлаш масалаларини муҳокама қилди. Бу ҳақда Жонсоннинг ўзи Twitter’даги саҳифасида маълум қилган.
«Бугун АҚШ президенти Жо Байден, Франция президенти Эммануэль Макрон, Германия федератив республикаси канцлери Олаф Шольц ва бош вазир Марио Драги билан Украинага ҳар томонлама кўмак бериш ва қўллаб-қувватлаш ҳақида суҳбатлашдим. Украинага қарши зўравонликларга барҳам берилмагунича ушбу позицияда собит турамиз», – дея твит қолдирган Жонсон.
Буюк Британия ҳукумати Жонсон ўтказган телефон суҳбатларидан бирининг мавзуси Ғарб мамлакатларини Россия энергия ресурсларига қарамлигини камайтириш бўлганини қайд этган.
«Ғарб етакчилари халқаро энергетик тузилма форматини ўзгартиришда биргаликда ишлаш ва Россия углеводородига қарамлик таъсирини камайтириш масалаларини муҳокама қилди», – дейилади Лондон пресс-релизида.
Баёнотга кўра Жонсон Ғарб Украинадаги уруш туфайли Россияга нисбатан қўллаётган чеклов чораларини сусайтирмаслиги зарурлигини таъкидлаган.
Музокараларнинг бошқа иштирокчилари ҳам Украинани қўллаб-қувватлашда давом этишини билдирган.
Аввалроқ Жонсон Лондоннинг Россияга нисбатан қўлланилган санкцияларни тинчлик келишуви тузилса ҳам олиб ташламоқчи эмаслигини айтганди. Эслатиб ўтамиз, 29 март куни Истанбулда Украина ҳамда Россия делегациялари урушга барҳам бериш юзасидан навбатдаги музокараларни ўтказган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)