Нидерландия ташқи ишлар вазирлиги мамлакатдан 17 нафар россиялик дипломат жосусликда гумон қилингани туфайли чиқариб юборилаётганини маълум қилди. Бу ҳақда «Нос.нл» хабар берган.
Махсус хизматлар тахминлари бўйича дипломатлар жосуслик фаолияти билан шуғулланган. Улар икки ҳафта ичида Нидерландиядан чиқиб кетиши лозим. Улар мамлакатни тарк этганидан кейин Нидерландияда россиялик дипломатлар сони 75 нафардан 58 нафаргача қисқаради.
Бир вақтнинг ўзида Бельгия ҳукумати ҳам 21 нафар россиялик дипломатнинг жосусликда гумон қилиниб, мамлакатдан чиқаруб юборилишини билдирган. Улар Россиянинг Брюсселдаги элчихонаси ва Антверпендаги консуллиги ходимлари. Дипломатлар икки ҳафта ичида Бельгиядан чиқиб кетиши шарт.
Шунингдек, Ирландия ҳукумати ҳам тўрт нафар дипломатнинг ўз мақомига зид фаолият билан шуғиллангани туфайли мамлакатдан чиқариб юборилганини маълум қилган. Чехия ҳам иттифоқчилар билан бирга қабул қилинган қарорга кўра бир нафар россиялик дипломатни ЕИ ҳудудида Россия разведка идоралари ходимларини қисқартириш учун юртига қайтариб юбормоқда.
Россия Украина ҳудудида махсус ҳарбий операцияларни бошлаганидан кейин АҚШ, Польша, Болгария, Словакия, Эстония, Латвия, Литва, Черногория, Шимолий Македония каби давлатлар жосуслик фаолиятини юритган россиялик дипломатларни ўз ҳудудларидан чиқариб юборган. Россия томони ҳам бунга кескин жавоб қайтармоқда ва ушбу давлатларнинг дипломатларини ўз юртларига қайтариб юборган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)