Телебошловчи ва продюсер Равшан Ҳакимов бир неча йил хусусий каналларда бошловчилик қилган. У беш йилдан буён оиласидан узоқда — Америкада истиқомат қилади. У океан ортидаги ўзбекларнинг тўй хизматларида бошловчилик қилишдан ташқари, тадбиркорлик билан ҳам шуғулланади. “Дарё” мухбири Наргиза Муродова у билан суҳбатда бўлди. Суҳбат давомида бошловчи океан ортидаги ҳаётнинг афзаллик ҳамда камчиликлари ҳақида сўзлаб берди.
“Американи ҳеч қачон орзу қилмаганман”
— “TV Марказ” телеканали ёпилганидан сўнг бир-икки йил умуман эфирга чиқмадим. Бу баъзилар ўйлагандек тақиқлар билан боғлиқ эмас. Шунчаки Р&Н продуcтион номли хусусий студиясини ташкил қилгандик. У ерда “Уй бекаси” ва “Қайнона ва келин” номли ситком сериаллар суратга олинди. 2015—2017 йиллар давомида эса “Тошкент” телеканалида шартнома асосида фаолият юритдим.
Америкага кетиш хаёлимда ҳам бўлмаган. Одамлар океан ортига келишни, бу ерда ишлашни орзу қилади. Ўйлаб қарасам бирор марта буни орзу ҳам қилмаган эканман. Аммо ҳаётда биз истамасак-да, қилишга мажбур бўладиган вазиятлар бўлади. Пешонамга ёзилган экан, беш йил аввал Америкага келдим. Аввалига бу ердаги ҳамкасблар билан океан ортидаги ҳаёт ҳақида кўрсатувлар тайёрлаб, ўзбек телеканалларига юборишни ният қилгандим. Аммо ҳамкасбларимда “Американи мақтагандек бўлиб қолмаймизми?” деган ҳадик бўлди. Шундан сўнг режаларимни ўзгартиришга қарор қилдим.
Беш йилдан буён Америкада истиқомат қиламан. Бу ерда изланяпман. Ўзим учун янгиликларни кашф қиляпман. Аммо ҳаёт ҳамон Американи ёмон кўрдириб келмоқда.
“Тилни билишим қўл келди”
— Дадам инглиз тили ўқитувчиси бўлган. Болалигимдан бу тилни ўрганишга “мажбур” бўлганим анча қўл келди. Бундан ташқари, Ўзбекистон давлат Жаҳон тиллари университетида таҳсил олганман. Шу сабаб, тил бўйича ҳеч қандай қийинчиликка учрамадим. Ўзбекистонда Азим Муллахоновнинг созандаси бўлган Жаҳонгир Мирзо бу ерда машҳур хонанда. У каби ватандошларимнинг ёрдами билан бу ерда жойлашишим қийин кечмади. “Америкага келдингми тезроқ соққа қилишинг керак”, деган шиор бор экан. Мен ундан анча узоқда бўлганим учун аввалига бир оз қийналдим. Сир эмас, кўпчилик Америкага пул топиш учун келади, шунинг учун иш танлаб ўтиришмайди. Менда ҳам шундай жараён бўлди.
“Ноҳақлик ва норозиликлар бўлди”
— Бошловчиликдан ташқари, “Наво” гуруҳига продюсерлик ҳам қилганман. Аммо бу ҳақида гапириш мен учун жуда оғриқли. Чунки бу гуруҳ учун яхшигина маблағ ва катта меҳнат сарфлагандим. Аммо баъзи бир инсонларнинг масъулиятсизлиги сабаб, каттагина меҳнат саробга айланди. Одатда уларнинг атиги беш фоизгина иқтидори бўлади, аммо продюсернинг 95 фоиз меҳнати сабаб халқ назарига тушади. Аммо баъзилар тезда ўзларидан юлдуз ясаб, “Мен бундан ортиғига арзийман”, деб талашади. Хуллас, шунга ўхшаш норозиликлар сабаб гуруҳ тарқалди. 2013 йил “TV Марказ” каналининг ёпилиши билан хонандаларнинг бири гуруҳни тарк этди. Аммо ўрнига олингани ҳам кутилганидек бўлмади. Ундан кейин телелойиҳаларга продюсерлик ҳам қилдим. Аммо у ерда ҳам ноҳақликларга учрагач, омадимни Америкада синаб кўришга қарор қилдим.
“Касбимиз оддий бўлса-да, одамлар учун манфаатли”
— Кўпчилик ўзбек санъаткорлари турли сабабларга кўра Америкага келиб қолган. Уларнинг бари билан яқинман. Улар бу ерга сочилган ризқини териш ва бола-чақаси учун қулайлик яратиш учун ҳаракат қиляпти. Кимнинг нима соҳада фаолият юритаётганига кўпчилик қизиқади. Фақат бир нарсани айтишим мумкин, касбимиз оддий бўлса-да, одамлар учун манфаатли.Бу юртга келган инсонда “Ишсиз қолсам кўчада қоламан, бу ерда ҳеч ким ёрдам бермайди”, деган ҳадик бўлади. Бундай шароитда ижод қилишга деярли вақт қолмайди. Юрагида ижод жўшиб турса ҳам, бу ерда шароит билан ҳисоблашишига тўғри келади.
“Америкага келганимдан афсусдаман”
— Ню-Ёркка самолёт қўнганида ўзимга “Нима қилиб қўйдим?” деган саволни берганман. Беш йил ичида бу саволга жавоб топганим йўқ. Мен ҳамиша АҚШ рекламаларда таърифланганидек “Орзулар мамлакати” эмас, дейман. Бу ер катта гўштқиймалагичга ўхшайди. Аввал катта чиғириқлардан ўтмасангиз, ҳеч қандай натижага эришмайсиз. Шунинг учун Америкага келганимдан кўп марта афсусланганман. Агар бу мамлакатдаги ҳаётим ҳақида китоб ёзадиган бўлсам, ундан қанчалик кетишни исташни яширмасам керак. Чунки мен бу ерда меҳмонман.
“Америкада доллардан бошқа ҳеч нарса йўқ”— Тан олиш керак, бу ерга келган ўзбекларнинг кўпчилиги ўзгариб, фақат пулнинг ортидан қувадиган бўлиб қолади. Ўзбекистонда бор нарсаларнинг кўпини бу ердан тополмайсиз. Масалан, хотиржамлик, ички ҳаловат, самимият ва тарбия йўқ. Ҳатто, муҳожирлар орасидан ҳам ўзингиз сингари самимий инсонни тополмайсиз. Америкада фақат доллар бор.
Мавзуга доир:
- АҚШга кўчиб кетган ўзбекистонлик машҳурлар (фото)
- Соҳиб Аббосхон АҚШда меҳмонхонада сувоқчилик қилгани ва қизининг сўзлари уни йиғлатгани ҳақида гапирди (видео)
- Гулчеҳра Эшонқулова илк марта АҚШга кетиши сабаби, турмуш ўртоғидан 13 ёш катталиги ҳақидаги гаплардан чарчагани ҳақида гапирди (видео)
- Туркияга кўчиб кетган ўзбекистонлик машҳурлар (фото)
- “Шайтанат”даги Ҳонгирейдан Зарина Низомиддиновагача: Россияда яшаётган ўзбекистонлик машҳурлар (фото)
Изоҳ (0)