«Реал» чап қанот ҳимоячиси Марселога ўринбосар топиш учун катта пул сарфламоқчи эмас.
Бразилиялик ҳимоячининг мадридликлар билан шартномаси 2022 йилнинг ёзида ўз ниҳоясига етади. «Қаймоқранглилар» Марселонинг ўрнига икки нафар футболчи номзодини кўриб чиқмоқда, дея хабар беради Marca.
Биринчи номзод, мадридликларнинг ўз тарбияланувчиси, Ла Лигада 3 та ўйинда майдонга тушган Мигел Гутьеррес. Бироқ мураббийлар штаби 20 ёшли футболчининг маҳоратига шубҳа билан қарамоқда ва унинг ривожланиши учун бошқа жамоага ижарага бериш вариантини ҳам кўриб чиқмоқда.
Иккинчи номзод, «Райо Вальекано»да тўп сураётган Фран Гарсия. Футболчи «қаймоқранглилар» тарбияланувчиси ҳисобланади ва Гарсия трансферининг 50% қисми мадридликларга тегишли. Уни жамоага қайтариш 5 миллион еврога тушиши мумкин. 22 ёшли Гарсиянинг «Реал»га қайтиш имконияти ошган.
Фран «Райо Вальекано» сафида Ла Лигада 26 ўйинда майдонга тушиб, битта голга муаллифлик қилди.
Аввалроқ «Реал» ёзда деярли 10 нафар футболчиси билан хайрлашишни режалаштираётгани хабар қилинганди.
Изоҳ (0)