Skype Ўзбекистонда эркин очила бошлади. Сервисдан тақиқ олиб ташлангани ҳақидаги маълумотни Ахборот технологиялари ва коммуникацияларини ривожлантириш вазирлиги матбуот котиби Шерзод Аҳматов «Дарё»га тасдиқлаган.
Мессенжер 2021 йил июль ойида Ўзбекистон фуқароларининг шахсга доир маълумотлар тўғрисидаги қонун ҳужжатларини бузувчилар реестрига киритилган эди. Ҳозирда Skype ушбу реестрдан чиқарилган. АКТ вазирлиги вакили мессенжернинг қайта ишлаши «Skype билан ўзаро манфаатли музокаралар натижаси» эканини маълум қилди.
Шерзод Аҳматовнинг қўшимча қилишича Ўзбекистонда блокланган ижтимоий тармоқларни реестрдан чиқариш бўйича музокаралар олиб борилмоқда. Ҳозирда реестрда тўртта ресурс мавжуд — Twitter, TikTok, «ВКонтакте» ва WeChat.
«Ўзбекистон сиёсати очиқлик ва шаффофлик. Шу мақсадда вазирлик томонидан глобал тармоқдаги ижтимоий тармоқлар билан ҳамкорлик ишлари олиб борилмоқда. Уларни эркин фаолият юритишлари учун белгиланган тартибда шароит яратиб бериш устида ишланмоқда. Музокаралар якунига кўра, секин-аста бошқа ижтимоий тармоқлар ҳам реестрдан чиқарилади. Бу ҳақда оммавий ахборот воситаларига қўшимча ахборот берилади», — дейди вазирлик вакили.
2021 йилнинг май ойида «Ўзкомназорат» «ВКонтакте», Twitter ва WeChat эгаларидан қонунга риоя қилишни талаб қилди ва июль ойида уларни қоидабузарлар реестрига киритди. Айни вақтда бир неча йил аввал Ўзбекистонда кириш чекланган Skype ҳам реестрда пайдо бўлган эди.
Эслатиб ўтамиз, 2021 йил июль ойида Ўзбекистонда TikTok ва Twitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди. 2022 йилнинг февраль ойида Ўзбекистонда TikTok’ни бутунлай блоклаш таклиф қилинганди. Бунга Адлия вазири муносабат билдириб, ахборот эркин тарқатилиши тарафдори эканини айтган ва жаҳолатга қарши маърифат билан курашиш кераклигини таъкидлаган.
2022 йилнинг 16 март куни Ўзбекистонда Twitter ва TikTok VPN иловаларисиз ишлай бошлади. Бироқ кўп ўтмай ижтимоий тармоқларга кириш яна чекланди.
Изоҳ (0)