Уй бекалари ҳам нотўғрилигини билмайди: овқат пиширишда тез-тез учрайдиган хатолар

Баъзида пазандаман деб бемалол мақтанадиганлар ҳам хатоликларга йўл қўйиши мумкин. Чунки йиллар давомида ўрганиб қолган одатларини нотўғри бўлиши мумкин-ку, деган шубҳа остига олмайдилар. AdMe нашри овқат пиширишда тез-тез учрайдиган хатоликлар ва уларни тузатиш ҳақида маълумот беради.

Овқатга туз сепишдаги хатолик

Ҳеч кўрганмисиз профессионал ошпазлар туз сепаётганда қўлларини таом ёки идишдан баландроқда тутишади. Гап шундаки, бошланғич нуқта қанчалик баланд бўлса, зираворлар юзага тенг равишда тақсимланади. Агар туз пастдан сепилса, аксинча, гўшт ёки овқатнинг бир қисми шўр бўлиб қолиши мумкин.

Гуручни пиширишдан олдин қовуриш керак

Гуручни янада майин қилиш ва қўшимча маза қўшиши мумкин бўлган тайёргарлик босқичи бор, лекин уни дангасалик қилиб ўтказиб юборамиз — бу гуручга сув қўшишдан олдин ёғда қовуришдир.

Бу жуда оддий иш: ёғни ўртача оловда товада қиздириб, унга гуруч қўшинг ва ранги ўзгармагунча қовуринг. Сув қуйгандан кейин қайнашини кутинг, қопқоғини ёпиб, тахминан, 20 дақиқа давомида паст оловда пиширинг.

Това ва ёғни етарлича қиздирмаслик

Бу одатнинг ёмон томони шундаки, совуқ товадаги ёғга солинган маҳсулот қовурилиш ўрнига, ёғни ўзига сингдиради. Натижада таом юқори калорияли ва ёғли бўлиб қолади, бу унинг таъмига ҳам сезиларли таъсир кўрсатади.

Мурчдан нотўғри фойдаланиш

Овқат тайёрлаётганда мурчнинг қандай майдалангани ҳам муҳим. Яхши майдаланган мурч таомни хушбўй қилади, шу билан бирга асосий зиравор эмас, қўшимча ҳисобланади. Каттароқ майдаланган мурч кўпроқ ароматик бўлиб, таомга ўзгача таъм қўшади.

Таом тайёрлаётганда қайси ҳолатда у ёки бу вариант кўпроқ мос келишини тушуниб олиш лозим: катта майдаланган мурч соуслар учун эмас, лекин гўшт ва салатларни идеал тарзда тўлдиради, майдароғи эса аксинча, юмшоқликни таъминлайди, соусга ўзгача лаззат беради, лекин стейк таъмини таъкидламайди.

Барча ингредиентлар ликопчага тушиши шарт эмаслигини унутамиз

Баъзан шўрва ёки соусларга таъмни яхшилаш ва ўзига хос лаззат бериш учун зарур бўлган ингредиентларни қўшамиз. Бироқ уларнинг ҳаммасини ҳам еб бўлмайди. Қозондаги кўкатлар ликопга тушмаслиги учун уларни олдиндан ип билан боғлаб қўйган маъқул. Таом тайёр бўлгач, бутун дастани қисқич билан олиб ташлаш кифоя.

Турли хил овқатлар учун битта куракчадан фойдаланамиз

Ошхона куракчаларининг турли хил шакл ва материаллардан тайёрланишининг ўзига хос сабаби бор. Уларнинг ҳар бири баъзи ҳолатлар учун мос келса, бошқаларига тўғри келмайди.

Силикон куракчалар хамир ёки крем ​​каби юмшоқ ингредиентларни аралаштириш учун мос келади. Гўшт учун ёғочлисидан фойдаланмаган маъқул, чунки ёғоч бактериялар учун кўпайиш муҳитини яратиши мумкин. Омлет каби нозик таомларни бутун пишириш учун текис куракчалар ўрнига эгриларидан фойдаланган маъқул.

Хамирга сариёғни қирғичдан чиқармай, бўлакларга бўлган ҳолда соламиз

Кўплаб рецептларда сариёғ қолган ингредиентлар билан яхши аралашиши учун етарлича юмшатилган бўлиши керак, лекин эритилмайди. Бундай ҳолда музлатилган сариёғни майдалаб, бир неча дақиқага қолдирилса — тезда идеал ҳарорат ҳолатига келади.

Баъзи рецептларда сариёғ совуқ ҳолда бўлиши керак, бу хамирнинг кўтарилишига ёрдам беради. Бундай пайтда музлатилган сариёғни қирғичдан чиқариб хамирга қўшиш энг яхши вариант.

Қиймани ҳаддан ортиқ кўп аралаштирамиз

Қиймага қўшилган ингредиентларни ортиқча аралаштириш уни қаттиқлаштириб, мазасига таъсир қилади. Қиймадан тайёрланадиган котлет, фрикаделка ва бошқа таомлар юмшоқ бўлиши учун уни жуда эҳтиёткорлик билан аралаштириш муҳим. Шунингдек, жуда қаттиқ думалоқламанг ёки сиқманг, буни енгил ҳаракатлар билан қилинг.

Айтганча, пишираётганда суви чиқиб, қуриб қолмаслиги учун котлетларни қаттиқ босмаслик ва тешмаслик керак.

Қуруқ ва янги кўкатларни қўшиш тартибини чалкаштириб юборамиз

Қуритилган кўкатлар қозонга қачон солинганига қараб овқатнинг таъмига бошқача таъсир қилиши мумкин. Фойдаланиш бўйича умумий тавсия — уларни бошида ёки пишириш вақтида қўшишдир, чунки уларнинг юмшаши учун вақт керак. Агар уларни охирида ёки тайёр овқатга қўшсангиз, улар нафақат хушбўй ҳидини очолмайди, балки тишларга ҳам кириб қолади. Бундай вазиятда тайёр овқатга янги кўкат солган маъқул.