Сирдарё туманидаги хўжаликлараро коллекторнинг Бахт шаҳарчаси ҳудудидан оқиб ўтувчи қисмида сув сатҳининг меъёридан ошиб кетиши оқибатида хонадонларга сув тошиб киргани тўғрисида хабар берилганди. Сирдарё вилояти ФВБ ёғингарчилик натижасида юзага келган тошқин оқибатлари бартараф этилгани тўғрисида маълумот берди.
15 март куни тинимсиз ёғингарчилик оқибатида Сирдарё вилоятининг Бахт шаҳри ҳудудидан оқиб ўтувчи «ВЖД» хўжаликлараро коллекторидан сув тошиши юзага келган. Сув сатҳи 4,5 метр куб/сонияга кўтарилиши натижасида Бахт шаҳарчасининг «Хазина», «Тадбиркор», «Ишонч», «Тинчлик» маҳалла фуқаролар йиғинларидаги жами 35 та кўчада сув тошган. 102 та хонадон ва 525 та ҳовлига сув йиғилиб қолган, 679 нафар фуқаро эвакуация қилинган.
Юзага келган вазиятни назорат қилиш, тезкор чоралар кўриш ва амалий ёрдам кўрсатиш мақсадида Сирдарё вилояти ҳокими Ғофуржон Мирзаев бошчилигида Сирдарё тумани ҳокимлиги, маҳалла вакиллари, ИИБ, Миллий гвардия, ФВБ, Қуйи Сирдарё ИТҲБ ва бошқа дахлдор ташкилот ва идораларнинг масъул ходимларидан иборат Тезкор штаб ва унинг ишчи гуруҳи тузилган. Вилоят ҳокимининг топшириғи билан сув босган хонадонлардаги аҳоли хавфсиз ҳудудларга кўчирилиб, озиқ-овқат ва зарур ашёлар билан таъминланган. Воқеа жойига зудлик билан етиб келган фавқулодда вазиятлар вазири генерал майор Абдулла Қўлдошев, сув хўжалиги вазири Шавкат Ҳамроев ва бошқа масъуллар билан бирга тезкор тадбир ишлаб чиқилиб ишга киришилган.
Шунингдек, мазкур ҳудудда авария-тиклаш ҳамда сув тошқини ҳудудидан сувларни чиқариб ташлаш тадбирларига махсус техникалар ва зарурий воситалар сафарбар этилган. Вилоят ҳудудидаги аҳоли турар жойлари (ҳовлилар), ижтимоий соҳа ва иқтисодиёт тармоқлари объектлари ҳудудлари ва кўчаларда йиғилиб қолган ёмғир сувларини чиқариб ташлаш учун 40 та ёнғин ўчириш автомобиллари, 25 та мотопомпа, 18 та сув ташиш техникалари ва 202 нафар ФВВ ходими жалб этилган.
Бахт шаҳрига Фавқулодда вазиятлар вазирлигининг 14 та ёнғин ўчириш автомобили, 16 та мотопомпа, 11 та чуқурлик насоси, туман ҳокимлиги ва Автомобиль йўллари бош бошқармасининг 9 та самосвал, 1 та автогрейдер, 2 та автопогрузчик, 2 та каток, 1 та автокран, 3 та автобус, 2 та сув ташиш техникалари ва 1 та трактори жалб этилиб, 28 та аҳоли хонадони ва 103 та уй ҳовлилари ҳамда кўчаларга тошган коллектор сувлари чиқариб ташланган.
Кучли ва тинимсиз ёғингарчилик натижасида сув сатҳининг кескин кўтарилиши сабабли йўлларда вужудга келган ноқулайликларни бартараф этиш мақсадида М-34 (Тошкент—Душанбе) автомобиль йўли Гулистон—Тошкент йўналишининг 72-104 километри оралиғида чуқурчаларни асфальтобетон қопламаси ёрдамида ямалган. Гулистон—Оҳангарон—Қўқон, 4К-671Д Бахт шаҳрига кириш, 4Р-25 Сайхун қишлоғи—Бахт шаҳарчаси—Қозоғистон чегараси ва Турон қишлоғи—Болтой қишлоғи автомобиль йўлларида тўпланиб қолган сувларни махсус техникалар ёрдамида кетказилган. «Янгиобод», «Хазина», «Тадбиркор», «Тинчлик» маҳаллалари ички хўжалик йўлларидаги тўпланиб қолган сувларни кетказиш ва чегара йўлларида қум шағал арашлашмаси билан текислаш ишлари олиб борилган.
Бахт шаҳар «Хазина», «Ишонч», «Тинчлик», «Тадбиркор» маҳалла фуқаролар йиғинлари ҳудудларидаги кўчаларнинг ёмғирдан зарар кўрган 746 та хонадонда юқумли ва паразитар касалликларини олдини олиш мақсадида Санитария-эпидемиологик осойишталик ва жамоат саломатлиги Сирдарё тумани бўлимининг 14 нафар ходими томонидан дезинфекция тадбирлари олиб борилмоқда.
«ВЖД» коллекторига қўйилган мосламадан сув сатҳи 1 метргача ва «ВЖД-3» коллекторидаги сув сатҳи 20 сантиметргача пасайган. Ушбу коллекторнинг ПК-35 нуқтасида жойлашган гидрокўприкда 7 нафар ишчи ва хизматчи томонидан ҳар хил йиғилган чиқиндилар тозаланган.
Сирдарё ва Тошкент вилоятлари «Тоза ҳудуд» ДУКнинг 4 тадан махсус техникалари ёрдамида 1920 метр куб тўпланиб қолган сув чиқариб ташланган.
Ўзбекистонда март ойи бошларидан буён ёмғирли об-ҳаво давом этмоқда. «Ўзгидромет» 17—24 март кунлари кутилаётган вақти-вақти билан кучли ёғингарчилик ҳамда ҳаво ҳароратининг сезиларли ўзгаришлари сабабли 7 та вилоятда қор кўчиш хавфи эълон қилинди.
Изоҳ (0)