«Барселона» собиқ бош мураббийи Рональд Куман Нидерландия терма жамоаси бош мураббийи бўлиши мумкин. Мутахассис бу лавозимда ЖЧ—2022 дан (2022 йилнинг декабрида) кейин шартномаси тугайдиган Луи ван Галнинг ўрнини эгаллайди, деб ёзади NOS.
Ўз штабини шакллантириш билан банд бўлган Куман ҳозирда ишсиз. У октябрь ойи охирида бир қатор қониқарсиз натижалардан сўнг «Барселона» устозлигидан истеъфога чиқарилганди.
Қайд этиш керак, 59 ёшли мутахассис 2018—2020 йилларда ҳам терма жамоани бошқарган. Нидерландия унинг қўл остида 2019 йилнинг ёзида Миллатлар Лигаси финалига қадар етиб борган. Ўшанда жамоа ҳал қилувчи баҳсда Португалияга 0:1 ҳисобида мағлуб бўлганди.
Эслатиб ўтамиз, Куман 2020 йилнинг августида «Барселона» бош мураббийи этиб тайинланганди. 2020/2021 йилги мавсумда каталон клуби Испания Кубогида ғалаба қозонди, Ла Лигада эса 3-ўринни эгаллади. Клуб раҳбарияти уни 2021 йилнинг 28 октябрида жамоа «Райо Валекано»га 0:1 ҳисобида мағлуб бўлганидан сўнг истеъфога чиқарган.
Изоҳ (0)