Коррупцияга қарши курашиш академиясини ташкил этиш 2022—2026 йилларга мўлжалланган Янги Ўзбекистоннинг тараққиёт стратегиясида белгиланган. Бу ҳақда Коррупцияга қарши курашиш агентлиги директори Акмал Бурҳонов 2021 йил якунларига бағишланган матбуот анжуманида маълум қилди, дея хабар бермоқда «Дарё» мухбири.
Анжуманда Акмал Бурҳоновнинг таъкидлашича, академия фаолияти аҳолининг деярли барча соҳа вакилларини қамраб олади.
«2022—2026 йилларга мўлжалланган Янги Ўзбекистоннинг тараққиёт стратегиясида давлатимиз раҳбари томонидан Коррупцияга қарши курашиш бўйича академия ташкил этиш вазифа қўйилди. Биз ҳамкор ташкилотлар, олий таълим муассасалари билан биргаликда давлат хизматчилари, тадбиркорлар, оддий фуқаролар, мактаб ўқувчилари, боғча тарбияланувчилари, умуман олганда барчани қамраб оладиган, ҳам онлайн, ҳам офлайн ўқитиладиган Коррупцияга қарши курашиш академиясини ташкил этишни режалаштирганмиз. Бу бўйича ишлар олиб бориляпти», — деди агентлик директори.
Бурҳоновнинг алоҳида таъкидлашича, тадбирда 2021 йилдан бошлаб Тошкент давлат юридик университети магистратура йўналишида коррупцияга қарши курашиш ва комплеанс назорат мутахассислиги бўйича таълим берилмоқда. Лекин республикада коррупцияга қарши курашиш бўйича мутахассислар етишмаяпти.
«Афсуски, бизда бугунги кунгача комплеанс назорат, яъни коррупцияга қарши курашиш бўйича мутахассислар йўқ. Биз жуда қийналяпмиз. 200 дан ортиқ вазирлик ва идораларда, ҳудудий ташкилотларда коррупцияга қарши ички назорат тузилмаларини ташкил қилишимиз керак, лекин мутахассис йўқ. Кўпчилик коррупцияга қарши ички назорат тузилмасида ҳуқуқни назорат қилувчи идораларда ишлаб келган одам ўтириши керак, деб ўйлайди. Йўқ, у ерда совға сиёсати, одоб-ахлоқ, харид масалалари турибди. Буни комплекс малакага эга, нафақат ҳуқуқни муҳофаза қилиш идораларида ишлаган, балки иқтисодий, ижтимоий, маънавий билимлари юқори бўлган ходимларни олиш масаласи турибди. Бу бўйича ҳам алоҳида магистратура йўналиши очиляпти», — деди ташкилот раҳбари.
Аввалроқ Акмал Бурҳонов давлат харидларида Навоий, Жиззах ва Андижон вилояти ҳокимликлари 2021 йилда энг кўп манфаатлар тўқнашувига йўл қўйганини айтиб ўтганди. Шунингдек, у мансабдорлар мол-мулки ва даромадларини ҳисобга олиш бошланиши ва декларация 2022 йил охиригача оммага очиқланишини маълум қилган.
Изоҳ (0)