Сенат ялпи мажлисида Қашқадарё вилояти Чироқчи туманининг чегараларини ўзгартириш ва Кўкдала туманини ташкил этиш тўғрисида қарор қабул қилинди, дея хабар бермоқда «Дарё» мухбири.
Маълум қилинишича, Чироқчи туманида яшаётган аҳолига қулайлик яратиш, урбанизация жараёнларини тартибга солиш ва аҳоли бандлигини таъминлаш мақсадида, ушбу туманнинг бир қисмида Кўкдала туманини ташкил этиш ҳамда унинг марказини Еттитом шаҳарчаси этиб белгилаш назарда тутилмоқда.
Сенатор Қутбиддин Бурҳонов «Дарё» мухбирига берган интервьюсида Чироқчи ҳудудининг катталиги аҳолига доимий қийинчилик туғдириб келгани ҳақида гапирди.
«Чироқчи — Ўзбекистондаги энг катта туманлардан бири. Мисол қилиб айтсам, бу туманнинг ҳудуди Андижон вилоятидан ҳам катта. Шунинг учун аҳолига хизмат кўрсатиш мураккаб, электр, газ, сув таъминотида муаммолар кўп. Туманни иккига бўлиш эса бу муаммоларга ечим бўла олади. Масалан, Чироқчи марказига бориб, давлат ташкилотларига мурожаат қилиш учун 100 километр масофа босиш керак. Туғилиш бор, ўлим бор. Одамларнинг туман марказида турли юмушлари бўлади. Айниқса, йўллар ва транспорт масалалари жуда оғриқли. Баъзида чекка қишлоқ аҳолиси марказга борса, кун ўтиб кетиб (масофа узоқлигидан), эртасига уйига қайтишга мажбур бўлади. Туман ҳудудининг иккига бўлиниши масофани 50 километрга қисқартиради», — деди сенатор.
Мажлисда айтилишича, Чироқчи туманида истиқомат қилаётган 420 минг нафар аҳолининг 176 минг 300 нафари, яъни 32 та маҳаллада яшаётган қисми Кўкдала тумани таркибига ўтказиш режалаштирилмоқда.
Шунингдек, Кўкдала тумани таркибига 162 та саноат корхонаси ва 1 та кичик саноат зонаси (Айритом) ўтказилиб, ишлаб чиқариладиган маҳсулот ҳажмининг туман саноатидаги улуши 151,9 млрд сўмни ёки 38 фоизни ташкил этади.
«Айритом» кичик саноат зонасининг 7 гектар майдонига муҳандислик-инфратузилма объектлари қурилиб, янги ишлаб чиқариш қувватлари яратилади. Халқаро аҳамиятдаги 94 километр йўл бўйида 150 та хизмат кўрсатиш объектлари (516 та иш ўрни), Еттитом ҳудудидан ўтган А-378 автомагистрал йўли ёқасида 6 гектар ерда хизмат кўрсатиш ва савдо комплекслари ташкил этилади. 10 минг гектар лалми ва адир ерларда томчилатиб суғориш технологияси асосида боғ-токзорлар қурилади. Натижада Кўкдала тумани таркибига ўтказилаётган аҳолига қулай шароитлар яратилади ҳамда туманнинг ижтимоий-иқтисодий салоҳияти ошишига хизмат қилади.
Маълумот учун, Чироқчи туманига 1926 йилда асос солинган. Ҳудуд аҳолиси 420 минг кишини, умумий ер майдони 2,8 минг квадрат метрни ташкил этади. Чироқчи тумани 2021 йилда аҳоли жон бошига саноат маҳсулотлари ишлаб чиқариш (1,8 миллион сўм), қишлоқ хўжалиги маҳсулотлари ишлаб чиқариш (8,2 миллион сўм), хизматлар ҳажми (1,8 миллион сўм) бўйича Қашқадарё вилоятида энг охирги ўринни эгаллаган.
Эслатиб ўтамиз, Шавкат Мирзиёев 2021 йил 24 октябрь куни бўлиб ўтган президентлик сайлови аввалида 2021 йилнинг 11 октябрь куни қашқадарёлик сайловчилар билан учрашганди. Учрашувда президентликка номзод сифатида сайловчилар билан кўришган Шавкат Мирзиёев Чироқчи ҳудуди катталиги, вилоятнинг қарийб ярим миллион аҳолиси шу ҳудудда яшашини, туман марказига етиб олиш 2–3 соат вақт талаб этишини инобатга олган ҳолда туман негизида Чироқчи ва Кўкдала туманларини ташкил этиш таклифини билдирганди. Шунингдек, Халқ депутатлари Чироқчи туман Кенгашининг 2021 йил 18 ноябрдаги қарорига кўра, Чироқчи туманидаги 32 та маҳалла янги ташкил этиладиган Кўкдала туманига ўтказилиши маълум қилинганди.
Изоҳ (0)