Кўрилган чора-тадбирлар натижасида Ўзбекистонда 2022 йилда буғдой ва шакар маҳсулотларида барқарорлик таъминланади. Бу ҳақда Қишлоқ хўжалиги вазирлиги «Дарё»га хабар қилди.
Қайд этилишича, мамлакатда аҳолини озиқ-овқат хавфсизлиги билан таъминлаш, ички бозорда талаб юқори бўлган маҳсулотларни етиштириш, зарур захираларни шакллантириш муҳим аҳамиятга эга. Бу борада жорий йилда аҳолини буғдой ва ун маҳсулотлари билан барқарор таъминлаш мақсадида 1 миллион 27 минг гектар ер майдонида буғдой экилган, натижада июнь—июль ойларида 7 миллион 679 минг тонна ҳосил етиштириш режалаштирилган. Бу кўрсаткич ўтган йилга нисбатан 1 миллион тоннага кўп.
Шунингдек, 2021 йил буғдой ҳосилида 6 миллион 656 минг тонна буғдой етиштирилган. Шундан 2 миллион 533 минг тоннаси республика дон захиралари учун «Ўздонмаҳсулот» АЖ ҳудудий корхоналарида жамғарилган. 4 миллион 123 минг тоннаси фермер ва аҳоли ихтиёрида қолган.
Ўтган йил якунига қадар 2 миллион 771 минг тонна буғдой дони ва 357,7 минг тонна ун хусусий сектор томонидан асосан Қозоғистондан импорт қилинган. 26,8 минг тонна буғдой дони (Тожикистонга 94 фоиз ва Қирғизистонга 6 фоиз) ва 949,1 минг тонна ун (1 млн 265 минг тонна буғдой ҳисобида) Афғонистонга экспорт учун йўналтирилган.
2022 йилда аҳолини шакар маҳсулотлари билан кафолатли таъминлаш мақсадида республикада 600 минг тонна маҳсулот ишлаб чиқариш режалаштирилган. Шунингдек, 2021 йилда 595,5 минг тонна шакар (2020 йилга нисбатан 315,1 фоиз) «Ангрен шакар» МЧЖ ва «Хоразм шакар» МЧЖ корхоналари томонидан ишлаб чиқарилган.
Мазкур корхоналар томонидан 2021 йил ва 2022 йил январь—февраль ойларида товар хом ашё биржасига аҳоли эҳтиёжини қоплаш мақсадида ҳар ойда 30 минг тоннадан кам бўлмаган миқдорда шакар савдога қўйилган. Ўтган йил якунига қадар 23 минг тонна шакар (ўтган даврга нисбатан 344 минг тоннага камайган) ва 620 минг тонна шакар хом ашёси (ўтган даврга нисбатан 423 минг тоннага ошган) Бразилиядан импорт қилинган ва 25 тонна шакар Афғонистонга йўналтирилган. Россия томонидан қўйилган чекловлар таъсир қилмайди.
2022 йил март—май ойларида таъминотчилардан яна қарийб 180 минг тонна хом ашё етиб келади. Бундан ташқари жорий йил июнь—октябрь ойларида 200 минг тонна шакар хом ашёси олиб келиш режалаштирилган.
«Юқоридагилардан келиб чиққан ҳолда, республикада аҳоли ва корхоналарнинг талабини узлуксиз, етарли миқдорда ва барқарор нархларда буғдой, ун, шакар маҳсулотлари билан таъминлаш ҳамда ички бозорларда нархларнинг кескин ўзгаришининг олдини олиш тўлиқ таъминланган», — дейилади хабарда.
Изоҳ (0)