Ўзбекистонда илк синов своп операцияси Молия вазирлиги ва Европа тикланиш ва тараққиёт банки ўртасида амалга оширилди, деб хабар беради вазирлик матбуот хизмати.
Маълум қилинишича, Молия вазирлиги томонидан молиявий рискларни бошқаришда ишлатиладиган дериватив молиявий инструментларидан бири бўлган своп битимларини тузиш амалиёти жорий қилинган. Своп битимлари молиявий рискларни бошқариш учун ишлатиладиган молиявий инструмент ҳисобланади. Валютавий своп битими своп турларидан бири бўлиб, турли валютадаги қарзларни валюта рискидан ҳимоя қилиш учун фойдаланилади.
Дастлабки босқичда Молия вазирлиги томонидан деривативлар бозорида кўп йиллик тажрибага эга бўлган Нидерландиянинг ТCХ фонди ва EТТБ техник кўмагида халқаро молия институтлари ва банклар билан своп операцияларини амалга ошириш юзасидан тажриба алмашинилган. Шунингдек, 2021 йил 29—30 сентябрь кунлари Тошкент шаҳрида ўтказилган Халқаро иқтисодий форум доирасида бир қатор хорижий молия ташкилотлари, жумладан, АҚШнинг JP Morgan Chase банки, ICBC Standard Bank, ва ТCХ фонди билан ўзаро келишувларга ҳам эришилган.
Молия вазирлиги томонидан мазкур битим Халқаро своп ва деривативлар ассоциацияси (ISDA) бош келишуви бўйича халқаро юридик компания Dentons’дан ижобий ҳуқуқий хулосаси олинган.
Своп битими бўйича энг яхши нарх таклиф қилган EТТБ билан ISDA бош келишуви имзоланган ва Осиё тараққиёт банкидан хорижий валютада жалб қилинган қарз маблағларининг 20 миллион доллар қисми бўйича своп операцияси амалга оширилган. «Қисқа қилиб айтганда, ушбу илк синов своп операцияси орқали 20 миллион АҚШ долларидаги давлат қарзи миллий валютадаги қарзга ўгирилди», — дейилади хабарда.
Своп операциянинг стратегик жиҳати:
- илк синов своп операцияси Ўзбекистон молия бозорида, хусусан, давлат ва хусусий сектор томонидан жалб қилинаётган ташқи қарз маблағларининг хорижий валюта рискларини самарали бошқаришда халқаро контрагентлар билан деривативлардан фойдаланишга йўл очиб беради;
- хориждан миллий валютада инвестиция жалб қилиш имконияти мураккаблиги ва чекланганлигини ҳисобга олганда, чет эл валютасидаги инвестицияларни дериватив инструментлар орқали сўмга ўгириш муқобил восита вазифасини бажаради;
- деривативлар бозори ривожланиши Ўзбекистон капитал бозорида молиявий рискларни самарали бошқаришга, хорижда эса сўмдаги актив ва мажбуриятларнинг тўғри баҳоланишига ҳамда миллий валюта бозорининг шакланишига хизмат қилади.
«Бу валюта рискларини бошқаришни ҳам, мамлакат реал секторини миллий валютада кредитлашни ҳам осонлаштиради. Бу, айниқса, Марказий Осиё ва ундан ташқарида беқарорлик ҳукм сураётган бир пайтда жуда муҳимдир», — дейди у.
Изоҳ (0)