Сурхондарёда Facebook орқали ақидапарастлик ғояларини тарғиб қилган шахс ушланди

Сурхондарёда Facebook ижтимоий тармоғида «Охират ҳисоби» номли профил орқали ақидапарастликни тарғиб қилувчи видеолар тарқатиб келган шахс қўлга олинди, деб хабар беради ЎзА.

ДХХ Сурхондарё вилояти бошқармаси ҳамда вилоят ички ишлар бошқармаси ҳамкорлигида ўтказилган тадбирда профил эгаси Сурхондарё вилояти Жарқўрғон тумани «Улуғбек» маҳалласида яшовчи фуқаро Б.А. экани аниқланган.

Унинг профилида номаълум ижрочига тегишли бўлган «Нашеед – ахи анта хуррун» («Брат, ти свободен») номли видео тарқатилган. Яна бир видео «Мавла ва қуд» («Мавлая код нашида») деб номланган.

Шунингдек, Б.А.нинг телефон рақамига очилган Telegram аккаунти орқали ҳам «Уч хил одамнинг ибодати қабул бўлмайди» номли Рашодхон домланинг маърузаси тарқатилган.

Вазирлар Маҳкамаси ҳузуридаги Дин ишлари бўйича қўмитанинг хулосасида Б.А. томонидан тарқатилган материаллар ақидапарастлик ғояларига йўғрилган бўлиб, уларни Ўзбекистон ҳудудига олиб кириш, тайёрлаш ва тарқатиш тақиқлангани кўрсатилган.

Мазкур ҳолат юзасидан фуқаро Б.А.га Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» бандига мувофиқ жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Сирдарёда халқаро террористик ташкилотга аъзолиги учун қамалган маҳкум қамоқхонадан туриб экстремистик гуруҳ тузгани аниқланган эди.