Буюк Британия ҳукумати «Челси»нинг собиқ хўжайини Роман Абрамовичга нисбатан санкциялар киритди. Бу ҳақида ҳукумат расмий сайти маълум қилди.
Россиялик тадбиркорнинг мамлакатдаги активлари музлатилган. Абрамовичга қўйилган санкциялар «Челси»нинг сотилишига тўсқинлик қилади.
Шунга қарамасдан, клуб футбол фаолиятини давом эттириш учун махсус лицензия олди.
Эндиликда «Челси» ўз ўйинларига чипта сота олмайди. Катта эҳтимол билан фақат мавсумий абонемент эгалари ўйинларга кира олади. Шунингдек, лондонликлар клубига трансферларни амалга ошириш ва футболчилар билан шартнома узайтириш тақиқланган.
Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.
Аввалроқ UFC собиқ чемпиони Конор Макгрегор Лондон жамоасини харид қилишга тайёрлигини билдирганди. Саудия Арабистони консорсиуми ҳам «Челси»ни харид қилиш учун курашга қўшилганди.
Изоҳ (0)