Buyuk Britaniya hukumati “Chelsi”ning sobiq xo‘jayini Roman Abramovichga nisbatan sanksiyalar kiritdi. Bu haqida hukumat rasmiy sayti ma’lum qildi.
Rossiyalik tadbirkorning mamlakatdagi aktivlari muzlatilgan. Abramovichga qo‘yilgan sanksiyalar “Chelsi”ning sotilishiga to‘sqinlik qiladi.
Shunga qaramasdan, klub futbol faoliyatini davom ettirish uchun maxsus litsenziya oldi.
Endilikda “Chelsi” o‘z o‘yinlariga chipta sota olmaydi. Katta ehtimol bilan faqat mavsumiy abonement egalari o‘yinlarga kira oladi. Shuningdek, londonliklar klubiga transferlarni amalga oshirish va futbolchilar bilan shartnoma uzaytirish taqiqlangan.
Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.
Avvalroq UFC sobiq chempioni Konor Makgregor London jamoasini xarid qilishga tayyorligini bildirgandi. Saudiya Arabistoni konsorsiumi ham “Chelsi”ni xarid qilish uchun kurashga qo‘shilgandi.
Izoh (0)