Навоий вилояти Учқудуқ туман ҳокимлиги мансабдор шахсларига нисбатан жиноят иши қўзғатилди. Бу ҳақда Коррупцияга қарши курашиш агентлиги ахборот хизмати хабар берди.
Қайд этилишича, агентлик томонидан Ўзбекистон президентининг 2017 йил 25 апрелдаги «Навоий вилоятининг олис чўл туманларида аҳолинингн турмуш даражасини янада оширишга доир қўшимча чора-тадбирлар тўғрисида»ги қарори талабларининг ижроси бўйича вилоятнинг Учқудуқ туманида ўрганиш ўтказилган.
Мазкур қарорда олис чўл ҳудудида камида 3 йилдан ортиқ яшаган шахслар олий таълим муассасаларида давлат гранти асосида қабул қилиниши белгиланган.
Ўрганишлар мобайнида эса Учқудуқ туман ҳокимининг собиқ ўринбосари ва бошқалар чўл ҳудудида жойлашган «Йўлчилар», «Кўкпатас» ва «Кўкаяз» МФЙларида 3 йил давомида яшамаган 33 нафар шахсга уларнинг ушбу муддатда қайд этилган маҳаллаларда яшагани тўғрисида сохта далолатномалар расмийлаштириб бериб, шундан 25 нафарини олий таълим муассасаларига давлат гранти асосида ўқишга киришига сабабчи бўлгани аниқланди.
Оқибатда давлат ва фуқароларнинг ҳуқуқлари, қонун билан қўриқланадиган манфаатларига жиддий зиён етказилган. Шунингдек, ушбу талабаларнинг грант асосида ўқиши учун амалда 650 миллион сўм бюджет маблағларининг сарфланишига сабабчи бўлиб, давлат манфаатларига зарар етказган.
Агентлик томонидан мазкур ҳолат юзасидан тўпланган ҳужжатлар ҳамда прокуратура идоралари ўтказган қўшимча ўрганишлар бўйича Бош прокуратураcи томонидан Учқудуқ туман ҳокимлиги мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилди.
Мавзуга доир:
- Самарқандда 50 минг доллар эвазига ДХХга ишга киритиб қўймоқчи бўлган шахс қўлга олинди
- Бухорода ўғлининг номидаги 7,4 гектар ерни ноқонуний равишда 84 минг долларга сотишга уринган шахс ушланди
- Сергелида ширкат мансабдорлари аҳолидан уй-жой коммунал хизмати учун ундирилган 193 млн сўмни ўзлаштиргани аниқланди
Изоҳ (0)