4 март куни Туркия ва Ўзбекистон ўртасида дипломатик муносабатлар ўрнатилганига 30 йил тўлди. Шу муносабат билан Туркиянинг Ўзбекистондаги фавқулодда ва мухтор элчиси Олган Бекар журналистлар билан учрашув ўтказди, деб хабар бермоқда «Дарё» мухбири.
«2019 йилда 2,3 миллиард АҚШ доллари кўрсаткичи билан икки томонлама савдо ҳажми бўйича эришган рекорд натижа 2021 йилда янгиланиб, 3,6 миллиард долларга етди. Биз учун яна бир қувонарли жиҳат шундаки, мамлакатлар ўртасидаги импорт ва экспорт ҳажмининг деярли тенглашгани бўлди. Бу статистик маълумотлар савдо алоқаларнинг бир-бирини тўлдириб, қўллаб-қувватловчи моҳиятда эканини кўрсатади.
2021 йилда Ўзбекистондаги турк фирмаларининг сони ва туризм статистикаси пандемия шароитларига қарамай жадал ортиб, ўз тарихидаги энг юқори даражага эришди. Президентлар томонидан белгилаб берилган ўзаро тижорат йиллик ҳажмнинг 5 миллиард долларлик маррага етказиш бўйича мақсадга қанчалик яқинлашганимизни исботлади», — дейди Олган Бекар.
Элчининг таъкидлашича, «2022—2026 йилларга мўлжалланган Тараққиёт стратегиясининг ҳам шу муваффақият тарихининг янги бир боби бўлишига шубҳа йўқ».
Олган Бекарнинг маълум қилишича, яқин кунларда Туркия президенти Ражаб Тоййиб Эрдўғоннинг Ўзбекистонга ташрифи кутилмоқда. Элчи ҳозирча ташриф санаси аниқ эмаслигини таъкидлади.
Изоҳ (0)