«Ўзгидромет» Қорақалпоғистоннинг айрим ҳудудларида кузатилаётган кучли шамол 6 март куни ҳам сақланиб қолишини маълум қилди.
Қайд этилишича, 2022 йил 4–5 март кунлари Қорақалпоғистоннинг Қозоғистон билан чегарадош ҳудудларида 20–25 метр/секунд тезликдаги кучли шамоллар кузатилиб, баъзи жойларда шамол тезлиги 30 метр/секундгача кучайган. Бундан аввал Қорақалпоғистон ҳудудларида қуруқ ва илиқ об-ҳаво кузатилган эди.
Кучли шамоллар ернинг қуриган юзасидан қум ва чанг кўтарилишига ҳамда айрим жойларда кўринувчанликнинг 180 метргача камайишига олиб келди.
«Ўзгидромет» томонидан об-ҳаво шароитининг кескин ўзгариши, кучли шамоллар ва чанг тўзонлар кўтарилиши ҳақида олдиндан огоҳлантириш берилганди.
«5 март соат 13:00 ҳолатига республика ҳудудида ёғингарчилик ёғмоқда, бу эса ўз навбатида қум ва чангли бўронларни атмосфера ҳавосига кўтарилишини олдини олади», – дейилади хабарда.
Аввалроқ Қорақалпоғистонда қум бўрони кузатилаётгани ҳақида хабар берилганди.
Изоҳ (0)