Тошкентдаги масжидларга ибодат учун келган фуқароларнинг буюмларини ўғирлаш билан шуғулланиб келган шахс қўлга олинди. Бу ҳақда пойтахт ИИББ хабар берди.
Маълум қилинишича, Тошкентнинг «Фирдавс» жоме масжидига ибодат қилиш учун келган Беҳзод исмли фуқаро ечиб қўйилган кийимининг чўнтагида бўлган iPhone телефони йўқолгани учун ички ишлар органларига мурожаат қилган.
Мурожаатга асосан олиб борилган тезкор-суриштирув тадбирлари давомида масжид ва унинг ён атрофидаги кузатув камералари ўрганилган. Ва 36 ёшли фуқаро содир этгани аниқланиб, ушланган.
Шайхонтоҳур тумани ИИБ ФМБнинг маълумотларига кўра, Наманган вилоятида туғилган Абдурашид исмли ушбу шахс муқаддам Жиноят кодексининг 168-моддаси, яъни фирибгарлик учун судланган.
Тергов жараёнида аниқланишича, бундан олдин Абдурашид «Умар ибн Хаттоб», «Минор» масжидларида ҳам фуқароларнинг телефонларини ўғирлаб сотиб юборган. Таъкидланишича, ҳозирда тергов ҳаракатлари давом этмоқда.
Аввалроқ Тошкентда 7 та масжидда содир этилган ўғриликларда гумонланган шахс қўлга олингани тўғрисида хабар берилганди.
Изоҳ (0)