Навоий вилоятида маст ҳолатда куёвини пичоқлаб ўлдирган қайнотага нисбатан чиқарилган суд ҳукми ўзгаришсиз қолдирилди. Бу ҳақда «Миллий» телеканали орқали эфирга узатилган лавҳада маълум қилинди.
Маълум қилинишича, 2021 йилнинг 26 июль куни соат 01:00 ларда маст ҳолатда бўлган қайнота набираларини олиб келиш учун куёвининг уйига келган. Икки эркак ўртасида юзага келган тортишув оқибатида куёв қайнотани итариб юборган. Қайнота эса пичоқ билан унинг ҳаёти учун муҳим бўлган тана аъзоларига бир неча маротаба жароҳат етказиб, унинг ўлимига сабабчи бўлган.
2022 йилнинг 18 январь куни Кармана туман судида ҳукм ўқилиб, судланувчига нисбатан 10 йил муддатга қамоқ жазоси тайинланган. Аммо суд ҳукмидан норози бўлган 65 ёшли судланувчининг шикоят аризаси билан Навоий вилоят судида ҳукм қайтадан кўриб чиқилган.
Навоий вилоят судининг ажримига кўра жиноят ишлари бўйича Кармана туман судининг ҳукми билан куёвининг қотилига айланган қайнотага тайинланган 10 йил муддатга озодликдан маҳрум қилиш жазоси ўзгаришсиз қолдирилган.
Аввалроқ Андижонда уйига келиб жанжаллашган қайнопасини пичоқлаб, ўлдирган йигитга суд ҳукми ўқилгани, Навоийда ухлаб ётган эрини болта билан чопиб ташлаган аёл 16 йилга қамалгани, Бухорода маст ота ўзига танбеҳ берган 18 ёшли ўғлини пичоқлаб ўлдиргани тўғрисида хабар берилганди.
Изоҳ (0)