Самарқандда 50 минг доллар эвазига ДХХга ишга киритиб қўйишни ваъда қилган шахс қўлга олинди.
Маълум қилинишича, Давлат хавфсизлик хизмати Самарқанд вилояти бўйича бошқармаси ходимларининг вилоят ИИБ ходимлари билан ҳамкорликда тезкор тадбир ўтказилган. Тадбирда муқаддам фирибгарлик билан боғлиқ жиноятлар содир этгани учун бир неча бор судланган шахс (1985 йилда туғилган) ҳуқуқни муҳофаза қилувчи органларда ишловчи мансабдор танишлари орқали фуқарони ДХХ идораларига ишга киритиб қўйиш эвазига 50 минг доллар олган вақтида ушланган.
ДХХ Наманган вилояти бўйича Бошқармаси ходимлари томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирда эса вилоят Фавқулодда вазиятлар бошқармасининг ҳарбий хизматчиси ўзганинг ишончига кириб, юқори лавозимда ишловчи танишлари орқали унинг фарзандини ички ишлар идораларига ишга киритиб қўйиш эвазига 5 минг доллар олган вақтида ушланган.
Шунингдек, Сирдарё вилояти Бахт шаҳрида яшовчи, собиқ ички ишлар ходими, ўзини гўёки Миллий гвардиянинг вилоят бошқармасида ишловчи ходими сифатида таништириб, Гулистон шаҳрида истиқомат қилувчи фуқарони Миллий гвардия тизимига ишга киритиб қўйишни ваъда қилгани аниқланган. У «хизмати эвазига» фуқародан 4 минг доллар олган вақтида ДХХ ва ИЖҚК департаментининг ҳудудий бошқармалари ходимлари томонидан қўлга олинган.
Бундан ташқари, пул эвазига Миллий Гвардияга ишга киритиб қўйиш ҳолати Қашқадарё вилоятида ҳам қайд этилган. Хусусан, муқаддам Мудофаа вазирлиги тизимида ишлаб, нафақага чиққан, Қарши шаҳрида яшовчи шахс 27 ёшли фуқарони Миллий гвардияга ишга киришида ёрдам бериш эвазига 4 минг доллар олган вақтида ушланган.
Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Аввалроқ Андижонда Миллий гвардияга ишга ва «Дипломатия»га ўқишга киритиб қўйиш учун 32 минг доллар олган шахслар ушлангани, Қашқадарёда Миллий гвардияга ишга киритиб қўйиш учун 4 минг доллар олган шахс қўлга олингани тўғрисида хабар берилганди.
Изоҳ (0)