Ўзбекистон Ташқи ишлар вазирлиги расмий вакили Юсуп Кабулжанов Украинадаги вазият юзасидан оммавий ахборот воситалари томонидан йўлланган саволларга жавоблар қайтарди.
Хусусан, у Марказий Осиёнинг бошқа давлатлари фуқаролари ҳам Украинадан эвакуация қилишда Ўзбекистондан ёрдам сўраб мурожаат қилдими, деган саволга тўхталиб ўтган.
«Марказий Осиё давлатлари ва Озарбайжон фуқароларидан Львовдаги мувофиқлаштириш марказимизга мурожаатлар бўлиб турибди. Имкон даражасида уларни чегарагача етказишда ёрдам берилмоқда», — дейди у.
Шунингдек, Кабулжанов Польша ҳудудида эвакуация қилинишини кутаётган Ўзбекистон фуқаролари 15 кун ичида ушбу мамлакатни тарк этишлари зарурлигини эслатиб ўтган.
«Польшадан аҳолини эвакуация қилиш бўйича махсус комиссия бошиданоқ эвакуация учун муҳлатни 2022 йилнинг 15 мартигача белгилаган. Кейин эса чет эл фуқаролари учун визасиз тартиб тугайди ва жарималар қўлланиши бошланади», — дейди ТИВ расмий вакили.
Мавзуга доир:
- «Ҳимояланган бункерларда қолиш тавсия этилади». ТИВ Украинанинг айрим шаҳарларидан фуқароларни эвакуация қилиш ҳарбий ҳаракатлар тугагач амалга оширилишини маълум қилди
- Ватандош жамоат фонди Ўзбекистон фуқароларини огоҳлантириб, хориждаги ҳарбий ҳаракатларда иштирок этмасликка чақирди
- Ўзбекистон Киевдаги элчихонасини кўчириш масаласини кўриб чиқмаяпти — ТИВ