«Навоий кон-металлургия комбинати» акциядорлик жамиятининг Жанубий кон бошқармаси ташаббуси билан Самарқанд ва Навоий вилоятида фаолият юритувчи журналистлар учун пресс-тур ташкил қилинди. «Дарё» мухбири Фарҳод Норбўтаевнинг маълум қилишича, пресс-тур иштирокчилари «Зармитан» конининг 420 метр чуқурликдаги иш жараёнлари билан танишган.
Республикада саноат маҳсулотлари ишлаб чиқаришдаги улуши 13 фоиздан ортиқни ташкил этадиган Навоий кон-металлургия комбинатининг Жанубий кон бошқармасида айни кунда олти минг нафарга яқин ишчи меҳнат қилади. Заркентда бошқарманинг тўртинчи гидрометаллургия заводи, «Зармитан» ва «Ғужумсой» конлари мавжуд. «Зармитан» ерости конининг йиллик маъдан қазиб олиш қуввати 850 минг тоннани ташкил этади. Шунингдек, «Ғужумсой» конидан йиллик 800 минг тонна, «Ўрталик» конида эса йилига 500 минг тонна маъдан қазиб олинади.
Ер остида фаолият юритиш, қазиб олинган маъданларни олиб чиқиш учун «Эпирог», «Сандвик», «Паус», «Минер» каби хориж компанияларининг энг замонавий техникалари — ерости ўзиюрар юклаш ва ташиш машиналари, шахта автоағдаргичлари, бурғилаш қурилмалари ва бошқа асбоб-ускуналардан фойдаланилади.
2021 йилнинг августида қурилган шахта кўтариш қурилмаси биноси ва ствол копёри 930 метр чуқурликкача тушиш ва ер қуйи сатҳларидаги захираларни юқорига — ер устки қисмига олиб чиқишни янада осонлаштирган. Шунингдек, ишчи-ходимлар, юкларни тушириш-кўтариш ва қазиб олинган маъданни юқорига ташиш учун қулайликлар яратган. Эски шахта кўтариш қурилмаси эса ер устки сатҳидан 300 метр чуқурликкача тушган, холос.
2018 йилда «Ғужумсой» конида чуқурлиги 500 метр, айланаси 6 метр бўлган янги шахта ишга туширилиши натижасида конининг лойиҳа қуввати 750 минг тоннадан ошган. 2021 йилда конда майдалаш-саралаш технологик тизим ва кўчма тўлдириш қурилмаси фойдаланишга топширилган. Келгусида «Ғужумсой» конининг ишлаб чиқариш қувватини йилига 100 минг тоннага етказиш кўзда тутилган.
2010 йил август ойида ишга туширилган тўртинчи гидрометаллургия заводи мамлакатимизда мустақиллик йилларида комбинат томонидан барпо этилган иккинчи йирик саноат мажмуаси ҳисобланади. 2010—2021 йилларда заводнинг таркибида олтин бўлган маъданни қайта ишлаш унумдорлиги йилига 1,8 миллион тоннадан 2 миллион тоннагача оширилган. Олтинни ажратиб олиш кўрсаткичи эса 92,2 фоизни ташкил этган. Ўтган вақт мобайнида корхонада «Зармитан» ва «Ғужумсой» конларидан қазиб олинган 20 миллион тоннадан ортиқ маъдан қайта ишланган.
Геологик тадқиқотларга кўра, Зармитан олтин конларининг захиралари заводнинг 2070 йилга қадар бир маромда ишлашига етади.
Изоҳ (0)