Украинадан Польшага эвакуация қилинган Ўзбекистон фуқароларини олиб учган Uzbekistan Airways авиакомпаниясининг навбатдаги самолёти 1 март куни соат 09:15 да «Тошкент» халқаро аэропортига келиб қўнди. Бу ҳақда Ташқи ишлар вазирлиги расмий вакили маълум қилди.
1 март ҳолатига кўра, Ўзбекистон дипломатик ваколатхоналари ва тегишли идораларининг биргаликдаги саъй-ҳаракатлари билан Украинадан 509 нафар фуқаро ўз ватанига қайтарилган.
Ҳозирги вақтда «Карчова» назорат-ўтиш пунктидаги тўпланиш жойида бўлиб турган 650 дан ортиқ фуқаролар учун барча зарур шароитлар яратилган. Ўзбекистон фуқароларини олиб келиш учун яна қатор эвакуацион рейсларни ташкиллаштириш кўзда тутилмоқда.
Ўзбекистоннинг Польшадаги элчихонаси дипломатлари фуқароларнинг масалаларини ҳал қилиш билан шуғулланмоқда ва уларнинг аэропортда бўлиб туришларини мувофиқлаштирмоқда. Элчихонада узлуксиз ишлайдиган тезкор штаб ташкил этилган.
Аввалроқ Ўзбекистоннинг Польшадаги элчиси Баҳром Бобоев Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилинишини айтганди. Унинг сўзларига кўра, 26 февралдан ҳозирги кунгача 800 дан ортиқ Ўзбекистон фуқароси Польша ҳудудидаги Украина—Польша чегарасидаги назорат-ўтказиш пункти орқали ўтган. Яна 700-800 га яқин Ўзбекистон фуқароси Украина—Польша чегарасини кесиб ўтишга тайёрланмоқда.
Изоҳ (0)