Туризм ва маданий мерос вазирлиги томонидан соҳадаги глобал инқироз ва янгича рақобат шароитларини инобатга олган ҳолда Ўзбекистоннинг 2030 йилгача бўлган даврда туризмни ривожлантириш стратегияси ишлаб чиқилмоқда. Бу ҳақда Туризм ва маданий мерос вазирининг биринчи ўринбосари Улуғбек Аъзамов Халқаро гид ва экскурсиячилар куни муносабати билан ўтказилган Ўзбекистон гидларининг V форумида айтиб ўтди, дея хабар бермоқда «Дарё» мухбири.
Форумда вазирлик раҳбарияти, мамлакатдаги сайёҳлик компаниялари вакиллари, гидлар ва экскурсиячилар иштирок этишди. Тадбир аввалида Туризм ва маданий мерос вазирининг биринчи ўринбосари Улуғбек Аъзамов сўзга чиқиб, гид ва экскурсиячиларга муваффақиятлар тилади.
Ўзбекистон президенти томонидан туризм соҳасини ривожлантиришга катта эътибор қаратилмоқда ва бу жаҳон ҳамжамияти томонидан юксак эътироф этилмоқда. Соҳани қўллаб-қувватлашга доир 90 дан ортиқ норматив-ҳуқуқий ҳужжатларнинг қабул қилиниши мамлакатимизда туризм турларини диверсификация қилиш, Ўзбекистоннинг халқаро майдондаги жозибадорлигини ошириш йўлида хизмат қилади.Форум доирасида мутасаддилар томонидан Ўзбекистонга ташриф буюраётган сайёҳлар оқимини ошириш учун «барча хизматлар жамланган» тарифларга эга туристик дастурлар ишлаб чиқиш таклифи илгари сурилди.Албатта, коронавирус пандемияси дунё миқёсида туризм соҳасига салбий таъсир кўрсатди. Чегараларнинг ёпилиши, хорижий мамлакатлардан туристлар саёҳат қилишларига оид турли чекловлар, вакцинацияга оид талаблар ва бошқа муаммолар шулар жумласидандир. Шунда қарамай Ўзбекистонда хавфсизлик қоидаларига риоя қилган ҳолда соҳани қўллаб-қувватлашга оид муҳим қарорлар қабул қилинди. Халқаро ташкилотлар билан алоқалар мустаҳкамланди. Халқаро тажриба таҳлили шуни кўрсатадики, глобал инқироз шароитида ички туризмни ривожлантириш энг тўғри йўл. Бугунги кунда соҳа вакиллари учун «Ўзбекистон бўйлаб саёҳат қил» дастури доирасида қатор имтиёзлар белгиланган.
Маълумотларга кўра, пандемия даврида 300 дан ортиқ янги сайёҳлик маршрутлари ишлаб чиқилди. Шу ўринда Ўзбекистоннинг туристик маршрутларини ўз ичига олган умумий каталог ишлаб чиқилишини мақсадга мувофиқ деб ҳисоблайман. Зеро бу барча сайёҳлар учун фойда бўлади.
Туризм ва маданий мерос вазирлиги томонидан соҳадаги глобал инқироз ва янгича рақобат шароитларини инобатга олган ҳолда Ўзбекистоннинг 2030 йилгача бўлган даврда туризмни ривожлантириш стратегияси» ишлаб чиқилмоқда. Бу эса сайёҳларни жалб қилишда ноанъанавий ёндашувларни талаб қилади. Айни шу нуқтаи назардан, туристик бизнес вакиллари, гид ва экскурсиячиларни ушбу ҳужжатни ишлаб чиқишда фаол иштирок этишга чорлаймиз.
Туризм ва маданий мерос вазирининг биринчи ўринбосари Улуғбек Аъзамов
Халқаро туризм ташкилотининг Ўзбекистондаги раҳбарининг маслаҳатчиси Шуҳрат Исакулов «Дарё»га берган интервьюсида ушбу форум анъанавий тарзда ҳар йили ўтказиладиган тадбирга айланганини айтди.
«Бу форумда нафақат гидлар, балки туризм бизнеси вакиллари ҳам иштирок этяпти. Бунда пандемия давридаги муаммоларнинг ечими, янги мақсад ва марраларга етказишдаги йўналишлар бўйича давра суҳбатлари ўтказиляпти. Тадбир уч гуруҳга бўлинган ҳолда ўтказилмоқда. Биринчиси, гидларнинг муаммоларига бағишланади. Улар ҳозирги кунда қандай муаммоларга дуч келяпти ва қайси йўл билан уларни ечиш керак? Шу каби масалалар бўйича гидларнинг фикр ва таклифларини олиб, ҳужжатга туширишга ҳаракат қиляпмиз. Иккинчи гуруҳда туристларга хизмат кўрсатишдаги муаммоларни таҳлил қилишга бағишланган. Учинчи гуруҳда эса пандемия даврида туристларни Ўзбекистонга жалб қилиш йўл-йўриғини топиш бўйича муҳокамалар қилинди», — деди у.
Маълумот учун, ҳар йили 21 февраль куни дунёнинг кўплаб мамлакатларида Халқаро гидлар куни (International Tourist Guide Day) нишонланади. Ушбу байрам Жаҳон гидлар уюшмалари федерацияси (WFTGA) томонидан таъсис этилган. WFTGA’га 1985 йил Биринчи халқаро гидлар конвенцияси доирасида асос солинган бўлиб, бугунга кунда дунёнинг 70 дан ортиқ мамлакатидан 2 миллиондан зиёд киши унинг аъзоси ҳисобланади. Халқаро гидлар куни 1990 йилдан буён нишонланиб келинади.
Изоҳ (0)