Айрим сайтларда 2021 йилнинг декабрида Ўзбекистон Фанлар академияси президиуми Самарқанддаги Гўри Амир мақбарасида Амир Темур қабрини очиш бўйича қарор қабул қилиб, 2022 йилнинг 23 февралида археологлар томонидан мақбара очилгани ҳақида хабар тарқалди. Ўзбекистон Фанлар академияси матбуот хизмати буни рад этди.
Раддияда таъкидланишича, ушбу хабар ёлғон бўлиб, Фанлар академиясида ушбу масала муҳокама қилинмаган ва кун тартибига қўйилмаган. Археологлар томонидан ҳам ҳеч қандай қазишмалар олиб борилмаган ва режалаштирилмаган.
Шунингдек, хабарда келтирилган қазишма раҳбари деб айтилган Тошмуҳаммад Ниёзович Қори-Ниёзий Ўзбекистон Фанлар академияси биринчи президенти ҳисобланиши, у 1970 йилда вафот этгани, тарқалган хабар эса 1941 йилдаги маълумотлар асосида тайёрлангани билдирилган.
«Маълумот тарзида қайд этиш лозимки, Гўри Амир мақбараси 1941 йилнинг 16—22 июнь кунлари ҳукуматнинг махсус қарори билан очилган бўлиб, экспедицияга профессор Тошмуҳаммад Ниёзович Қори-Ниёзий раҳбарлик қилган. Дастлаб Амир Темур ўғиллари Мироншоҳ, Мирзо Шоҳруҳ, невараси Мирзо Улуғбек, 1941 йилнинг 19 июнида Амир Темур қабри очилган. Ундан сўнг Амир Темурнинг невараси Муҳаммад Султоннинг қабри ҳам очилган.
Антрополог М.М.Герасимов ўзи яратган усул билан Амир Темур, Мироншоҳ, Шоҳруҳ, Мирзо Улуғбек ва Муҳаммад Султонларнинг ҳужжатли портретларини яратган. 1942 йилнинг охирларига келиб, Амир Темур мақбарасидан қазиб олинган суяклар илмий жиҳатдан ўрганиб бўлингач, қайтадан ўз жойларига дафн этилган», — дейилади Ўзбекистон Фанлар академияси хабарида.
Маданият вазирлиги ҳам тарқалган хабар ҳеч бир асосга эга эмаслигини, археологик тадқиқот олиб бориш учун тегишли тартибда давлат органлари ҳамда ваколатли ташкилотлардан рухсат олиниши кераклигини маълум қилди.
Изоҳ (0)