Ўзбекистонлик олимлар сигир ва эчкиларни ZF-UZ-VAC2001 вакцинаси билан эмлаш орқали коронавирусга қарши нейтраллаштирувчи антикорлари бўлган сутни ишлаб чиққани хабар қилинганди. Инновацион ривожланиш вазирлиги «Дарё»га иммун сутини олиш лойиҳаси бўйича қўшимча маълумотларни тақдим этди.
Қайд этилишича, вазирлик ҳузуридаги Халқаро молекуляр аллергология маркази ҳамда Австриянинг Вена тиббиёт университети билан ҳамкорликда SARS-CoV-2 вирусига қарши иммун сутини олиш лойиҳасини амалга оширмоқда. Марказнинг Биотехнологиялар ва компоратив тиббиёт соҳасидаги олимлар жамоаси ўзбек-хитой вакцинаси билан эмланган сигирларнинг иммун сутидан тажриба намуналари олган. Олинган иммун сути коронавирусга қарши антитаналарга эга бўлиб, SARS-CoV-2 вирусини одам ҳужайрасидаги АPF-2 рецептори билан боғланишини нейтраллаштириш хусусиятига эга, бу вируснинг инсон ҳужайрасига кириши ва кўпайишига тўсқинлик қилади. Келажакда мазкур иммун сути ва ундан олинган маҳсулотлар саноат даражасида ишлаб чиқаришга тавсия этилиши мумкин.
Халқаро молекуляр аллергология маркази ҳамда Қорақалпоғистонда фаолият юритаётган PanaevFarms FX компанияси ўртасида тузилган ҳамкорлик шартномасига кўра, ҳозирда 31 бош симментал (говмиш) наслдор сигири ҳамда Австрия ва Германиядан олиб келинган голштин зотли сигирлар хавфсиз ва самарали бўлган ZF-UZ-VAC2001 вакцинасининг 3 дозаси билан тўлиқ эмланган.
Бўғозлик даврида ўзбек-хитой вакцинаси билан эмланган сигирларнинг оғиз сутида SARS-CoV-2 вирусига қарши таначалар максимал даражада бўлиши олимлар томонидан тасдиқланган. Январь ойининг охирида сигирлар болалай бошлаган. Оғиз сути ва сутдан олинган тажриба намуналари устида кейинги клиник-лаборатория тадқиқотлари давом эттирилмоқда.
Бундан ташқари, давлат стандартларига риоя этган ҳолда узоқ муддатли пастеризация жараёни сутнинг барча хусусиятларини, жумладан, антитаначаларнинг нейтраллаштирувчи фаоллигини сақлаб қолган. Келажакда иммун сути ва ундан олинадиган маҳсулотлар саноат даражасида ишлаб чиқаришга тавсия этилиши мумкин. Иммун сутидан ташқари, олинган хом ашёдан сўриладиган таблеткалар ҳамда ваниль, ялпиз, лимон мазали оғиз бўшлиғига сепиладиган спрейлар ишлаб чиқариш режалаштирилган. Олинган маҳсулот аҳолини оммавий пассив иммунизация қилиш учун қўлланилиши кўзда тутилган.
Harvard Medical School олимларининг тадқиқотлари натижаларига кўра, сигирларнинг IgG иммуноглобулин концентрати инсон ошқозонидаги ҳазм қилиш жараёнларида барқарорлиги йўқотмайди ҳамда специфик боғловчи ва нейтралловчи хусусиятларини сақлаб қолади. Олинган маҳсулот қўшимча ҳазм қилувчи дори воситаларини қабул қилишни ёки ошқозонда эрийдиган капсулалар шаклида ишлаб чиқаришни талаб этмайди.
Изоҳ (0)