Ўзбекистон президенти Шавкат Мирзиёев 23—24 февраль кунлари Қорақалпоғистон Республикасида бўлиб қайтди. Давлат раҳбарининг бу галги ташрифи бошқаларидан анчагина фарқли бўлди, дейиш мумкин. Вилоят ҳокимларининг Қорақалпоғистон ҳудудларига бириктирилиши, кичкина, узоқ йиллар мобайнида эътибордан четда қолиб келаётган туманларга берилаётган катта маблағлар, маҳалла раислари, ёшлар етакчилари ва ҳоким ёрдамчилари билан суҳбатлар — давлат раҳбарининг Қорақалпоғистонга ташрифидан кейинги хулосалар.
Орол денгизига эътибор ва «тузли» Қорақалпоғистон ҳақида
Биз журналистлар гуруҳи давлат раҳбари ташрифидан бир кун аввал Нукусга етиб борган эдик. Кун давомида президент ўтган йилларда бориб кўрган, бугунги кунда эса амалда бажарилган лойиҳаларнинг айримлари билан танишдик. Йўлда юрар эканмиз четроқда турган қорга ўхшаш оппоқ тузларни кўрдик. Аввал «Қорақалпоғистонда туз йиғилиб қолган» деган гапларни эшитганимизда ўзимизча тасаввур қилар эдик. Ҳолатни кўзимиз билан кўргач ҳақиқий аҳвол тасаввур қилиб юрганимиз кўрганимиз олдида ҳеч нарса эмаслигини тушундик.
Ташрифнинг илк куни Нукус шаҳридан Мўйноққача самолётда етиб олдик. Парвоз давомида учоқ ойнасидан пастга қарасак эътиборимизни тортган энг катта нарса — Орол денгизи ва унинг қуриб бораётган қисми бўлди. Бу жуда аянчли, афсусланарли ҳолат. Президент Шавкат Мирзиёев 2017 ва 2020 йилларда БМТнинг сессияларида Орол ҳақида гапирган эди.
Президент Орол денгизининг қуриган жойига бориб кўрди. Бу ерга 2022 йилда 100 минг гектар майдонда «яшил қоплама» барпо қилиш режалаштирилган. Бугунги кунда шундан 26 минг гектарида иш бошланган, 562 тонна уруғлар тайёрланган. Шунингдек, 100 гектар майдонда кўчатхона ташкил қилинмоқда экан.
Мўйноқ туманига бириктирилган Тошкент вилояти ҳокимлиги — Зоир Мирзаев президентга тақдимот ўтказди
Ташрифдаги энг яхши янгиликлардан бири — Оролбўйини биргаликда ривожлантириш мақсадида Қорақалпоғистон Республикаси туманлари муайян вилоятларга бириктирилган. Ташрифнинг илк кунида Шавкат Мирзиёев Мўйноқ тумани фаоллари билан учрашув ўтказди.
Икки соатдан ошиқ вақт давомида бўлган мазкур йиғилишда Мўйноқ туманига масъул бўлган Тошкент вилояти ҳокими Зоир Мирзаев тақдимот қилди.
Шу ўринда Мўйноқдаги айни вақтдаги ҳолатга эътибор қаратамиз. 1931 йилнинг 19-сентябр куни ташкил топган ушбу туманда бугунги кунда 33 минг киши истиқомат қилади. Шундан 12,2 минг нафари иш билан таъминланган бўлса, 1,2 минг киши вақтинча ишсиз. 293 киши айни вақтда чет элда ишлайди. «Темир дафтар», «ёшлар дафтари» ва «аёллар дафтари»да бугунги кунда 172 киши бор. Тумандаги 18 та мактабинг 7 таси таъмирталаб, яна 10 тасида жиҳозлар етишмайди. 50 нафар ўқитувчининг маълумоти ўрта-махсус. Бундан ташқари, туманда жами 28 та боғча бор, бироқ Қизилжар ва Бўзатов ОФЙларда боғча мавжуд эмас.
Эндиликда ҳудудда 20 дан ортиқ лойиҳалар амалга оширилади, бир неча минг иш ўрни яратилади. Бунда инфратузилма янада яхшиланиб, истироҳат боғлари, мактаб, кутубхона, санаторий ва болалар оромгоҳи қурилади. Шунингдек, президент Тошкентдан тиббиёт соҳаси вакиллари Қорақалпоғистонга келиб ишласа, уларнинг ойлик маошига 100 фоиз устама ҳақи тўланишини айтди. Тиббиёт ходимлари Мўйноққа келиб ишласа, уларнинг устама ҳақи икки баравар бўлади. Тошкент вилояти мазкур йўналишда 32 миллиард сўм ажратиши маълум қилинди.
Давлат раҳбари Мўйноқ аэропорти ҳақида гапириб, «энди ҳафтада икки марта Тошкент—Мўйноқ—Нукус йўналишида парвозлар бўлишини» айтди.
Кичик бир туманга қаратилаётган эътиборни кўриб ҳайрон қоласан киши. Шу ўринда савол туғилади, Ўзбекистон ўз мустақиллигига эришганидан сўнг бу каби ишлар бўлганмиди? Президент кўп бор таъкидлаганидек, «қилса бўлар экан». Давлат раҳбари аввалги йилларда ҳам, бу галги ташрифда ҳам бир нарсани айтган — «Маданият Мўйноқдан бошланиши керак». Ўзбекистоннинг биринчи рақамли борти Мўйноқ аэропортига қўнганининг ўзи бир ажойиб янгилик бўлди, эндиликда амалга ошириладиган ишлар эса эътирофга лойиқ.
Қорақалпоғистонда қурилишига тамал тоши қўйилган шамол электр станцияси ва ҳамкорларнинг эътирофи
24 февраль куни эрта тонгдан Беруний тумани томон йўл олдик. Бу ерда президент туман фаоллари ва ҳамкорлар билан учрашиши режалаштирилган эди. Йиғилиш аввалида давлат раҳбари қуввати 100 МВт бўлган Қораўзак шамол электр станцияси қурилишини бошлаш учун тамал тошини қўйди. Давлат раҳбари мазкур лойиҳага Қорақалпоғистоннинг ҳавоси ҳам фойда бериши аниқлигини айтди.
«Неча йиллар давомида бу ер энергетика танқислигини бошдан кечиряпти. Нега биз бунга кўп эътибор беряпмиз? Агар биз катта корхоналар қурмоқчи бўлсак, келадиган инвестор ҳам инфратузилманг борми, газинг, сувинг, йўлинг, темир йўлинг, аэропортинг борми, деб сўрайди. Коррупция бўлмайдими, деб савол беради», — дейди Шавкат Мирзиёев.
Учрашувда ҳамкорлар ҳам ўз фикр-мулоҳазалари билан ўртоқлашди. Саудия Арабистонининг Acwa Power компанияси директори, ушбу мамлакатнинг Ўзбекистондаги фавқулодда ва мухтор элчиси ҳамда Европа тикланиш ва тараққиёт банки вакили сўзга чиқди ва улар Ўзбекистонга ишончи юксак эканини қайд этишди.
Acwa Power компанияси директори Муҳаммад Абунаяннинг таъкидлашича, Ўзбекистон электр тармоғидаги ўзгаришлар, трансформацияни олиб кириш бўйича ишлар нафақат Ўзбекистон учун, балки бутун Ўрта Осиёда энергетика тизимига ўзгариш олиб кирадиган лойиҳа ҳисобланади.
«Биз Acwa Power компанияси дунёнинг 13 та мамлакатида фаолият юритар эканмиз, лекин фақат Ўзбекистонда давлат хусусий шерикчилиги асосидаги лойиҳанинг тез, унумли суратда, ҳаққоний равишда шаффофликка асосланган ёндашув асосида амалга оширилаётганини кўришга муваффақ бўлдик. Шунинг учун ҳам биз 2,9 миллиард АҚШ долларига тенг бўлган инвестициямиз билан кириб келмоқдамиз. Биз сизнинг олиб бораётган ишларингизга ишонамиз», — деди у.
Европа тикланиш ва тараққиёт банкининг Ўзбекистондаги ваколатхонаси раҳбари Алкис Дракинос бугунги кунда банкнинг Ўзбекистонда 60 дан зиёд лойиҳалар борлиги, уларнинг умумий қиймати 2 миллиард евродан ошишини таъкидлади.
Тан олиш лозим, бу лойиҳа ҳар томонлама хавфсиз, экологик тоза ва фойдали бўлади. Ушбу лойиҳанинг айнан Қорақалпоғистонда амалга оширилаётгани ҳам эътиборга молик жиҳат.
«Чимбой гузари» маҳалласида оқсоқоллар билан самимий суҳбатлашган президент, Нукусга бириктирилган Тошкент шаҳар ҳокимлигининг тақдимоти ва ҳудудларда амалга оширилиши режалаштирилган лойиҳалар
Шавкат Мирзиёев 24 февраль куни турли ҳудудларга ташриф буюрди. Хусусан, президентнинг эътиборга молик ташрифидан бири Нукус шаҳридаги «Чимбой гузари» маҳалласидаги Кўктепа кўчасида яшовчи Габит Жусупов хонадонида оқсоқоллар билан самимий суҳбати бўлди.
Президент матбуот котиби Шерзод Асадов Telegram каналида шу ҳолатдаги суратни эълон қилганида беихтиёр бизнинг юзимизга ҳам табассум югурди (аввалроқ таъкидлаганимиздек, манзиллар кўплиги боис бизнинг гуруҳимиз бошқа жойда эдик). Давлат раҳбарининг фуқаролар билан суҳбатлари ҳамиша қизиқарли кечган.
«Сизларнинг маҳаллаларингизда бўлган ишларни ўзим кўрдим. Нукуснинг атрофида яна шундай еттита маҳалла бор экан. Маҳаллаларининг трансформаторини, йўлини, сувини тўғрилаш бўйича ҳисоб-китоб қилиб беришди, уларга пул бердим. Президент бу ерга келди, энди натижа бўлсин, деб масъулларга топшириқ бердим. Ишга жойлашган қизларимиз билан кўришиб, суҳбатлашдим. Уларнинг кайфиятини кўриб, ўзим ҳам хурсанд бўлдим», — дея президентнинг сўзларини келтирмоқда «Ўзбекистон 24» телеканали.
Шавкат Мирзиёев Нукус шаҳрида иш бошлаган пластик эшик ва ромлар корхонасини ҳам бориб кўрди.
Шу ернинг ўзида давлат раҳбарига Нукус шаҳрини 2022 йилда комплекс ижтимоий-иқтисодий ривожлантириш дастури тақдимоти ҳам ўтказилди. Маълумот учун, Тошкент шаҳар ҳокимлиги Нукус шаҳрига бириктирилган.
«Ўзбекистон 24» телеканалининг «Ахборот» дастурида берилган маълумотларга кўра, ҳудуднинг драйвери — озиқ-овқат ва қурилиш материаллари саноати, туризм. Шу асосда Нукус шаҳрини 2022 йилда комплекс ижтимоий-иқтисодий ривожлантириш дастури ишлаб чиқилган. Унга кўра, умумий қиймати 1 триллион 361 миллиард сўмлик 10 лойиҳа амалга оширилиши режалаштирилган. Бунинг натижасида қўшимча 3 мингта иш ўрни яратилади. Хусусан, логистика хизмати, қизилмия илдизини қайта ишлаш, меҳмонхона тармоқлари, замонавий технологиялар асосида мебель ишлаб чиқариш ва пахта тўқимачилик кластерлари каби лойиҳалар амалга ошириш мақсад қилинган.
Бундан ташқари, Нукус шаҳрида сайилгоҳлар, 39 та кўп қаватли уйларнинг 45 минг 877 квадрат метр қисми таъмирланади. Олтита болалар майдончаси, саккизта «street work out» майдончаси, 7070 квадрат метр велосипед йўлаклари қурилиб, 6000 квадрат метр рангли брусчаткалар ўрнатилади.
«Ахборот» кўрсатувида берилган маълумотларга кўра, 2022 йилда Қорақалпоғистоннинг тўртта туманида Янги Ўзбекистонда массивлари қурилиши бошланади. Қораўзак, Кегейли, Қонликўл ва Қўнғирот туманларида замонавий яшаш мажмуалари қат кўтаради, 5 қаватли 30 хонадонли уйлар барпо этилади.
Шунингдек, Шавкат Мирзиёев 24 февралнинг ўзида Нукус шаҳридаги инвестиция лойиҳалари ситуацион маркази фаолияти билан танишди. Шу ернинг ўзида президентга Андижон, Наманган, Сирдарё, Сурхондарё ва Фарғона вилояти ҳокимлари ўзларига бириктирилган туманларга тадбиқ этиш учун ишлаб чиққан лойиҳаларни тақдим қилишган.
Шундай қилиб Шавкат Мирзиёевнинг Қорақалпоғистонга ташрифи ўз якунига етди.
Изоҳ (0)