Тошкент шаҳри Яккасарой туманида ишхонасида ходимларига намоз ўқиш учун шароит яратиб берган раҳбар 21,6 миллион сўм миқдорида жаримага тортилгани хабар қилинганди. «Миллий тикланиш» демократик партияси марказий кенгаши раиси Алишер Қодиров ҳолатга муносабат билдирди.
У ўз муносабатида амалдаги қонунчилик нормаларида ибодат қилганлик ва ибодат учун шароит яратиб берганлик учун ҳеч қандай жавобгарлик тури йўқ эканини қайд этган.
«1998 йил 1 майда қабул қилинган ‘Виждон эркинлиги ва диний ташкилотлар тўғрисида’ги қонуннинг 14-моддасида амалга ошириш жойи чекланган амаллар қаторида диний маросимлар билан бирга ибодат ҳам кўрсатилган. Шунингдек, 2021 йил, 5 июлда қабул қилинган янги таҳрирдаги ‘Виждон эркинлиги ва диний ташкилотлар тўғрисида’ги қонуннинг 7-моддасида ‘Миллий тикланиш’ ДП фракциясининг ташаббуси билан жой бўйича чекловлар белгиланган амаллар қаторидан ибодат сўзи олиб ташланган.
Демак, амалдаги қонунда ибодат жойи учун чеклов белгиланмаган. Албатта, ибодат одобига риоя қилиш мажбурияти муҳокама учун мавзу эмас.
Судья ибодат учун шароит яратган Фарҳод Раҳмоновга нисбатан Маъмурий жавобгарлик тўғрисидаги кодекснинг 201-моддаси иккинчи қисми билан жаримани хато қўлламоқда. Модда ибодат ёки ибодатга шароит яратганлик учун эмас, ‘диний маросим’ ўтказиш талабини бузганлик учун қўлланади.
Фарҳод Раҳмонов суд қарори устидан белгиланган тартибда шикоят қилиши мумкин.
Қолаверса, инсон ҳуқуқ ва эркинликлари устувор деб ҳисобланаётган мамлакатимизда эътиқод қилувчиларни ибодат амаллари учун, бутун дунёда кенг қўлланаётган амалиёт сифатида, жамоат жойларида ҳам қулай шароит яратиб берилиши керак», — дейди Қонунчилик палатаси спикерининг ўринбосари.
Мавзуга доир:
- «Нима учун давлат хизматида иш бошлаш вақтини 08:30, олийгоҳларда ўқиш бошлаш вақтини 10:00 га белгилаш мумкин эмас? Осмон узилиб ерга тушмайди» — Алишер Қодиров
- «Ширин фарзандига буни раво кўриш учун аёл ўзидан ҳам воз кечиб бўлган». Алишер Қодиров 3 яшар қизини айиқ қафасига ташлаган аёлни лаънатлаётганларга қарши чиқди
Изоҳ (0)