Дариға Назарбоева Қозоғистон Парламенти Мажлисининг депутатлигидан кетди
Қозоғистоннинг биринчи президенти Нурсултон Назарбоевнинг тўнғич қизи Дариға Назарбоева мамлакат парламенти депутатлиги ваколатларидан воз кечганини эълон қилди. Бу ҳақда “Zakon.kz” хабар берган.
«Бугун Парламент Мажлиси депутатлиги ваколатларидан воз кечишга ва жамоатчилик, ижтимоий, маданий ва хайрия фаолиятига асосий диққат-эътиборимни қаратишга қарор қилдим.
Нур Отан партиясига овоз берган қозоғистонликлар, партиядошларим ва мамлакатимиз раҳбариятига менга ишонч билдирганлари учун миннатдорман.
Январдаги фожиавий ҳодисалар тинчликсиз ва Қозоғистон халқининг бирлашувисиз халқ фаровонлиги ҳамда мамлакатимизнинг тараққиёти бўлмаслигини кўрсатди.
Содир бўлган воқеалар – халқимиз учун жуда катта фожиа. Ҳодисаларни чуқур текшириш ва объектив тарзда тергов қилиш керак, деб ҳисоблайман. Айбдорларга нисбатан адолатли жазо берилиши, айбсизлар эса озодликка чиқарилиши зарур.
Биз, барча қозоғистонликлар, жамиятимиз ‘январнинг қора кунлари’дан сабоқ олишимиз ва бу каби ҳодисалар бошқа такрорланмаслиги учун ўзимиздан талаб этиладиган барча ишларни қилишимиз зарур.
Ушбу фожиавий даҳшатли кунлар ва қўрқув анархия қандай оқибатларга олиб келишини кўрсатиб берди.
Ватанимизнинг бугуни ва эртанги куни учун, миллий суверенитетимизни ва мустақиллигимизни сақлаш, тинчлик ҳамда хавфсизликни таъминлаш учун бирлашишимиз, бирдамлик билан ҳаракат қилишимиз керак.
Мен бундан буёғига ҳам мамлакатимиз ва унинг манфаатлари учун хизмат қилишда давом этаман.
Бу ишни қилишим учун менга давлат хизматида ҳеч қандай лавозим керак эмас», – дейилади депутат Дариға Назарбоеванинг мурожаатида.
Мавзуга доир:
- Қозоғистондаги тартибсизликлар вақтида 14 нафар ўзбекистонлик қўлга олингани маълум бўлди. Улар тергов изоляторида сақланмоқда
- «Credit Suisse сирлари»: журналистлар Швейцария банкидан сиздирилган ахборот асосида амалга оширилган суриштирувни эълон қилди
- Назарбоев даврида Қозоғистонда кимлар бойлик орттирганди?
