Европа иттифоқи мамлакатлари Россиянинг Луганск ҳамда Донецк Халқ Республикаларининг мустақиллигини тан олганига жавобан мамлакатга нисбатан янги санкциялар пакетини маъқуллашга қарор қилди. Бу ҳақда Евроиттифоқ дипломатияси раҳбари Жозеп Боррелга таяниб, «Интерфакс» хабар берган.
«Россияга жиддий зарба берадиган янги санкциялар ЕИ мамлакатларининг вакиллари томонидан бир овоздан маъқулланган», – дея қайд этган Боррел Парижда бўлиб ўтган Евроиттифоқ хориж масалалари бўйича кенгашининг норасмий конференциясида.
Унинг сўзларига кўра, санкциялар рўйхатига 27 жисмоний ва юридик шахс, жумладан, Россиянинг Донбассдаги операцияларини молиялаштирадиган банклар ва ташкилотлар, шунингдек ДХР ва ЛХР мустақиллиги учун овоз берган Россия думасининг 351 нафар депутати ўрин олган.
Аввал Европа иттифоқи санкциялари Россия парламентарийлари ва банкларига нисбатан татбиқ қилиниши мумкинлиги ҳақида хабарлар тарқалганди. Аммо хабарларда қайси компаниялар ва парламент аъзоларига нисбатан тақиқлар жорий қилинишига аниқлик киритилмаган.
Евроиттифоқ Россия ҳамда Украина атрофидаги кескин вазиятни дипломатик йўл билан, БМТ ва ЕХҲТ билан биргаликда ҳал этиш тарафдори.
«Нима қилиб бўлса ҳам ушбу низони бартараф этишимиз зарур. Россияни музокараларга қайтариш учун ишлашда давом этамиз», — дея таъкидлаган Боррел.
Европа иттифоқ расмийлари Россиянинг келгусидаги ҳаракатларини диққат билан кузатиб борилиши ва мамлакатга яна қўшимча тақиқлар қўлланилиши мумкинлигини инкор этмаган.
Изоҳ (0)