Россия ташқи ишлар вазирлиги Украинадаги дипломатик миссия дипломатлари ва ходимларининг эвакуацияси бошланишини эълон қилди. Бу ҳақдаги баёнот вазирликнинг расмий веб-сайтига жойлаштирилган.
Элчихона ва бош консуллик ходимлари яқин вақт ичида эвакуация қилинади, дейилади вазирлик баёнотида.
Россия ТИВ ушбу қарорни Украинадаги дипломатларга 2014 йилдан бери тажовузкор ҳаракатлар содир этилгани ва уларнинг ҳаёти хавф остида қолаётгани билан изоҳлаган.
«Улар билан ҳисоб-китоб қилиниши, ўлдириб кетиш ҳақидаги таҳдидлар келган. Машиналари ёқиб юборилган. Киев ҳукумати дипломатик ва консуллик тўғрисидаги Вена конвенциясидаги мажбуриятларга зид равишда бу каби воқеаларга муносабат билдирмаган», — дея қайд этган Россия ТИВ.
22 февраль куни Украина ТИВ Путин ДХР ва ЛХР мустақиллигини тан олганидан кейин мамлакат президенти Владимир Зеленскийдан Россия билан дипломатик муносабатларни тўхтатиш масаласини кўриб чиқишни таклиф этган. Маълумотларга кўра Россия ТИВ бу каби баёнотларга жавоб қайтармаган ва муносабатларнинг узилишини истамайди.
Изоҳ (0)