21-fevral kuni Samarqand viloyati Jomboy tumanida joylashgan Zarafshon milliy bog‘ining uchinchi qismi hududida yong‘in sodir bo‘ldi. Bu haqda viloyat Ekologiya va atrof-muhitni muhofaza qilish boshqarmasiga tayanib, Zarnews xabar berdi.
Ma’lum qilinishicha, yong‘in oqibatida 0,25 gektar maydondagi suv tol va malina tuplari zarar ko‘rgan. Olov voqea joyiga yetib kelgan yong‘in-qutqaruv brigadalari tomonidan tezkorlik bilan o‘chirilgan.
Ayni vaqtda viloyati Ekologiya va atrof-muhitni muhofaza qilish boshqarmasi tegishli idoralar bilan birgalikda hodisa yuzasidan qonun hujjatlarida belgilangan tartibda tekshiruv o‘tkazmoqda.
Eslatib o‘tamiz, Jizzax viloyatining Zomin tumani “Duoba” qishloq fuqarolar yig‘ini O‘riklisoy qishlog‘i yaqinidagi o‘rmon hududlarida 2021-yil 1-avgust kuni yirik yong‘in yuz bergandi. Soat taxminan 10:40 da boshlangan yong‘in salkam sakkiz soatdan so‘ng o‘chirilgan. FVV ma’lumotlariga ko‘ra, 80 gektar maydonda quruq o‘t va daraxtlar yongan. Olovni o‘chirishga 1600 ga yaqin odam jalb etilgan. Keyinroq prezident Shavkat Mirziyoyev yong‘in “bir boyvachchaning o‘g‘li” sabab sodir etilganini ma’lum qilgandi.
Izoh (0)