«Сени ‘Ювентус’ ёллаган». Жозе Моуриньо «Верона»га қарши баҳсда ҳакамга бақиргани учун дисквалификация қилиниши мумкин

«Рома» бош мураббийи Жозе Моуриньо Италия чемпионатининг 2—3 ўйинига дисквалификация қилиниши мумкин.

Football Italia’нинг хабар беришича, А Сериянинг 26-туридан ўрин олган «Верона»га қарши баҳсда (2:2) ўзини тутиши португалиялик мутахассиснинг четлатилишига сабаб бўлиши мумкин.

Қўшиб берилган дақиқаларда учрашув бош ҳаками Лука Пайретто қўнғироқ ишорасини кўрсатгани учун 59 ёшли мураббийга қизил карточка кўрсатди. Ундан ташқари Моуриньо ҳакамга қарата: «Улар сени атайин юборган, ‘Ювентус’ сени ёллаган!», — деб бақирган. Бу эса унинг зарарига ишлаши мумкин.

Қайд этиш керак, Моуриньо бунгача бир неча бор мусобақалардаги ҳакамликдан норозилигини билдирганди.

Римликларни олдинда «Специя» (27 февраль), «Аталанта» (6 март) ва «Удинезе»га (13 март) қарши баҳслар кутиб турибди. 2021/22 йилги мавсумда «Рома» Италия чемпионатида 26 ўйиндан сўнг 41 очко билан саккизинчи ўриндан жой олган.

Мавзуга доир: Болаликдан етукликкача. 59 ёшни қарши олган Жозе «Беназир» Моуриньонинг ҳаёти суратларда