Навоий шаҳридаги «Янги ҳаёт» савдо мажмуасида бобо ва набира эскалатордан қулаб тушгани ҳақида хабар берилганди. Соғлиқни сақлаш вазирлиги ҳодисада жиддий жароҳат олиб, шифохонага етказилган 3 ёшли набиранинг аҳволи ҳақида маълумот берди.
Ҳодиса 18 февраль куни соат, тахминан, 20:30 да содир бўлган. Улар мажмуанинг 5- ва 4-қаватлари оралиғидаги эскалаторда мувозанатини йўқотиб, 1-қаватга йиқилган.
1969 йилда туғилган фуқаро Ш.Т. воқеа жойида вафот этган. Тан жароҳати олган 3 ёшли набира А.Т. эса зудлик билан вилоят кўп тармоқли болалар тиббиёт марказига ётқизилган.
Шундан сўнг унда стандарт бўйича неврологик, ультратовуш ва бош мия МСКТ каби қатор текширувлар амалга оширилган.
Бемор А.Т.га қўшма жароҳат, бош мия ёпиқ жароҳати, бош мия лат ейиши, ўрта оғир даражаси, пешона соҳаси юмшоқ тўқималари лат ейиши, ўнг томонлама чаноқ суяклари синиб силжиши, ўнг ўпка лат ейиши, чап сон пастки учлиги юмшоқ тўқималари лат ейиши дастлабки ташхиси қўйилган.
«Соғлиқни сақлаш вазирлиги унинг ҳолатини назоратга олган. Тиббиёт ходимлари стабил оғир аҳволдаги беморнинг ҳаётини сақлаб қолиш учун курашмоқда. Унга стандарт асосида тегишли тиббий ёрдам кўрсатиляпти», – дейилади ССВ хабарида.
Изоҳ (0)