Чемпион йигит Камолиддин Расулов ўлимида айбланаётган шахс курашчи Шерали Жўраев билан ҳам адоватда бўлган

Марҳум спортчи, 2012 йилда ўтказилган самбо бўйича ўсмирлар ўртасидаги жаҳон чемпионати ғолиби Камолиддин Расулов ўлими юзасидан 2022 йилнинг 8 февраль куни бошланган суд мажлиси 18 февраль куни соат 14:30 да ўз ишини давом эттирди, дея хабар берди «Дарё» мухбири.

Судда спортчи ўлимида айбланаётган Ш.Т.нинг акаси гувоҳ сифатида сўз олиб, укаси курашчи Шерали Жўраев билан адоватда бўлганини билишини, аммо марҳум билан қарама-қаршиликка бориб қолганидан хабари йўқлигини маълум қилди.

Судда жабрланувчининг ҳимоячиси Баҳром Абдуназаров гувоҳ Я.Т.га юзланиб, биринчи суд мажлисида қотилликда айбланаётган Ш.Т. акасининг марҳум Камолиддин Расулов билан зиддиятга борганидан хабари борлигини айтганини эслаб, укасининг гапларини тасдиқлаши ёки инкор этишини сўради. Гувоҳ Я.Т. саволга жавоб берар экан, укасининг курашчи Шерали Жўраев билан адовати борилигини билишини, аммо марҳум Камолиддин Расулов билан қарама-қаршиликка бориб қолганидан хабари йўқлигини билдирди.

Адвокат, шунингдек, гувоҳ Я.Т.нинг воқеа жойига қачон боргани билан қизиқиб, укаси билан «дом»дан бирга чиққан ёки чиқмаганини сўради. Саволга жавоб берган Я.Т. «дом»дан укасидан сўнг, тахминан, 15 дақиқадан сўнг чиққанини, сўнгра унинг ортидан борганини, борганида эса қотиллик содир бўлиб ўтганини айтган бўлса, яна бир гувоҳ — воқеа жойида бўлган ҳайдовчи Э.Н. эса Я.Т. уйдан укаси билан кетма-кет икки дақиқадан ўн дақиқагача бўлган вақт давомида чиққанини билдирди.

Эслатиб ўтамиз, аввалроқ марҳумнинг беваси эрининг ўлимида судга гувоҳ сифатида таклиф қилинган Я.Т.нинг ҳам қўли борлигини айтгани, гувоҳ Я.Т. эса укасини излаб унинг ортидан чиққан пайтда барча воқеалар содир бўлиб ўтгани, қотиллик воқеаси айнан қандай содир бўлганини кўрмагани ҳақида хабар қилинганди.

Суд ишида 2022 йилнинг 25 февраль куни соат 14:30 гача танаффус эълон қилинди.

Самбо бўйича жаҳон чемпиони 29 ёшли Камолиддин Расулов 2021 йилнинг 13 сентябрь куни соат 21:30 да Тошкент шаҳрининг Учтепа туманидаги кўп қаватли уйлар олдида бошқа бир спортчи томонидан пичоқлаб ўлдирилганди. Бош прокуратура ахборот хизматининг расмий маълумотида чемпион йигитнинг пичоқланишига унинг гумонланувчи танишига «Humo Троп» витаминини тавсия қилгани, оқибатда эса гумонланувчининг соғлиғи ёмонлашгани, шифокорлар бу касалликнинг давоси йўқлигини билдиргани хабар берилганди. Жиноят ишлари бўйича Учтепа туман судида сўз олган гувоҳ ҳам таниши, судда абланувчи сифатида иштирок этаётган Ш.Т. марҳум Камолиддин Расулов тавсия қилган витаминни айтилган миқдордан кўра кўпроқ истеъмол қилгани сабаб соғлиғи ёмонлашганини, кечалари иссиғи чиқиб, ухоломайдиган бўлиб қолганини айтди.  Воқеа содир бўлган куни пичоқдан жароҳатланган спортчини икки киши қувлаб кетаётганини жамоатчиликка ошкор қилган «Марказий студия» кўрсатуви мухбирига интервью берган номаълум суҳбатдош эса витаминни қабул қилган спортчига шифокорлар энди ўласан, деб айтишганини, спортчи шу сабаб мен ўлсам, уям ўлади, дея марҳумни пичоқлаганини айтганди.